ITRFiling: ఐటీఆర్ ఫైలింగ్‌లో ఫారం 16కు సంబంధించి కీలక మార్పులు.. జీతం పొందే ఉద్యోగులు తప్పనిసరిగా తెలుసుకోవలసిన విషయాలు
ఈ వార్తాకథనం ఏంటి
2024-25 ఆర్థిక సంవత్సరానికి సంబంధించి జీతం పొందే ఉద్యోగులకు జూన్ 15 నాటికి ఫారం 16 అందుబాటులోకి రానుంది. ఈ సంవత్సరం కేంద్ర బడ్జెట్‌లో తీసుకువచ్చిన మార్పుల ప్రభావంతో ఫారం 16లో పలు కీలకమైన మార్పులు చోటుచేసుకున్నాయి. జీతభత్యాలపై పన్ను చెల్లించే ఉద్యోగులందరికీ ఫారం 16 అనేది అత్యంత ముఖ్యమైన పత్రం. ఈసారి మూడు ముఖ్యమైన మార్పులు ఫారం 16లో కనిపించనున్నాయి.
వివరాలు
1. ఇతర ఆదాయ వివరాల ప్రాముఖ్యత
ఇతర సంవత్సరాల మాదిరిగానే, ఈసారి కూడా ఉద్యోగి జీతం నుంచి తీసుకున్న టాక్స్ డిడక్టెడ్ అట్ సోర్స్ (టీడీఎస్) వివరాలు ఫారం 16లో ఉంటాయి. కానీ ఈసారి పెద్ద మార్పు ఏమిటంటే, ఉద్యోగి ఫారం 12BBAను తన యజమానికి సమర్పించినట్లయితే, ఇతర వనరుల ద్వారా వచ్చిన ఆదాయంపై టిడిఎస్, ఖర్చులకు సంబంధించి తీసుకున్న టీసీఎస్ వివరాలు కూడా ఫారం 16లో కనిపిస్తాయి. అంటే, ఇతర ఆదాయాలపై కూడా మీరు పన్ను చెల్లించినట్లయితే, ఆ మొత్తం కూడా ఇప్పుడు ఫారం 16లో స్పష్టంగా సూచించబడుతుంది. దాంతో మొత్తం ట్యాక్స్ ఎంత మినహాయించబడిందో సరిగా అర్థం చేసుకునే అవకాశం ఉంటుంది.
వివరాలు
2. స్టాండర్డ్ డిడక్షన్ రూ.75,000కి పెంపు
ఈ ఏడాది బడ్జెట్ ప్రకారం, కొత్త ఆదాయపు పన్ను విధానాన్ని ఎంచుకున్న ఉద్యోగులకి స్టాండర్డ్ డిడక్షన్‌ను రూ.50,000 నుంచి రూ.75,000కి పెంచారు. దీంతో కొత్త ట్యాక్స్ విధానంలో ఉండే ఉద్యోగులకి టీడీఎస్ తగ్గింపులో రూ.75,000 డిడక్షన్ ఫారం 16లో చూపబడుతుంది. అయితే పాత పన్ను విధానాన్ని అనుసరించిన వారికి మాత్రం ఇదే తగ్గింపు రూ.50,000కి పరిమితం అవుతుంది. ట్యాక్స్ విధానం ఎంచుకోవడం ద్వారా ఈ మినహాయింపు స్థాయి మారుతుంది.
వివరాలు
3. ఎన్పీఎస్ కంట్రిబ్యూషన్‌పై పెరిగిన మినహాయింపు
కొత్త పన్ను విధానాన్ని అనుసరించే ఉద్యోగులకి, సెక్షన్ 80CCD(2) కింద వారి ప్రాథమిక జీతంలో 14 శాతం వరకు ఎన్పీఎస్ కంట్రిబ్యూషన్‌పై మినహాయింపు పొందే అర్హత ఉంది. ఇది యజమాని జమ చేసే ఎన్పీఎస్ మొత్తంపై వర్తిస్తుంది. మీరు కొత్త పన్ను విధానాన్ని ఎంచుకుంటే మాత్రమే ఈ అధిక తగ్గింపు ఫారం 16లో చూపబడుతుంది. అయితే ఐటీఆర్ ఫైలింగ్ సమయంలో మీరు పాత పన్ను విధానాన్ని ఎంచుకుంటే, ఈ తగ్గింపు శాతం తగ్గి 10 శాతానికి పరిమితం అవుతుంది. అంటే, పాత ట్యాక్స్ విధానంలో ఉన్నవారికి 80CCD(2) కింద కేవలం 10% మినహాయింపు మాత్రమే వర్తిస్తుంది.