LIC Share Price: LIC షేర్లకు భారీ దెబ్బ.. ప్రభుత్వ OFSతో ఒక్కరోజే 9% వరకు పతనం

వ్రాసిన వారు Sirish Praharaju

Aug 04, 2026

10:51 am

ఈ వార్తాకథనం ఏంటి

ప్రభుత్వ రంగ బీమా సంస్థ లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) షేర్లు మంగళవారం స్టాక్ మార్కెట్‌లో భారీ ఒత్తిడిని ఎదుర్కొన్నాయి. కేంద్ర ప్రభుత్వం సంస్థలో తన వాటా విక్రయ ప్రక్రియను అధికారికంగా ప్రారంభించడంతో పెట్టుబడిదారుల నుంచి అమ్మకాల ఒత్తిడి పెరిగింది. దీంతో ఒక్కరోజే LIC షేరు ధర సుమారు 8.87శాతం వరకు క్షీణించింది. ముఖ్యంగా ప్రభుత్వం ప్రకటించిన ఆఫర్ ఫర్ సేల్ (OFS)ధర మార్కెట్ ధర కంటే తక్కువగా ఉండటంతో షేరుపై ప్రతికూల ప్రభావం స్పష్టంగా కనిపించింది. కేంద్ర ప్రభుత్వం ఒక్కో LIC షేరుకు రూ.382ను కనీస ధర (ఫ్లోర్ ప్రైస్)గా నిర్ణయించింది. అలాగే సంస్థలో గరిష్ఠంగా 6.5 శాతం వరకు వాటాను విక్రయించేందుకు మంగళవారం నుంచి ప్రక్రియ ప్రారంభించింది.

వివరాలు

OFS ద్వారా తొలిదశలో 2 శాతం ఈక్విటీ వాటాను విక్రయించనున్న కేంద్ర ప్రభుత్వం

ఈ ఫ్లోర్ ప్రైస్ సోమవారం ముగింపు ధరతో పోలిస్తే సుమారు 10.9 శాతం తక్కువగా ఉండటంతో మార్కెట్ ప్రారంభం నుంచే LIC షేర్లు భారీగా పతనమయ్యాయి.

తక్కువ ధరకు కొత్త షేర్లు అందుబాటులోకి రావడంతో మార్కెట్‌లో ఇప్పటికే ట్రేడవుతున్న షేర్లపై కూడా ఒత్తిడి పెరిగింది.

ఈ OFS ద్వారా కేంద్ర ప్రభుత్వం తొలిదశలో 2 శాతం ఈక్విటీ వాటాను విక్రయించనుంది.

అదనంగా పెట్టుబడిదారుల నుంచి మంచి స్పందన లభిస్తే 'గ్రీన్ షూ ఆప్షన్' కింద మరో 4.5 శాతం వాటాను కూడా విక్రయించే అవకాశం ఉంచింది.

దీంతో మొత్తం 6.5 శాతం వరకు వాటా విక్రయానికి మార్గం సుగమమైంది.

వివరాలు

తక్కువ ఫ్లోర్ ప్రైస్ కారణంగా స్వల్పకాలంలో LIC షేరుపై ఒత్తిడి

ఇది LIC చరిత్రలో కీలక పరిణామంగా భావిస్తున్నారు.2022లో స్టాక్ మార్కెట్‌లో లిస్టింగ్ అయిన తర్వాత ప్రభుత్వం చేపడుతున్న తొలి వాటా విక్రయ ప్రక్రియ ఇదే.

ఈ చర్య ద్వారా ప్రభుత్వ వాటాను క్రమంగా తగ్గించడంతో పాటు,మార్కెట్ నియంత్రణ సంస్థ సెబీ (SEBI) నిర్దేశించిన కనీస ప్రజా వాటా(Minimum Public Shareholding)నిబంధనలను నిర్ణీత గడువులోగా అమలు చేయాలన్న లక్ష్యంతో కేంద్ర ప్రభుత్వం ముందుకు సాగుతోంది.

మార్కెట్ విశ్లేషకుల అభిప్రాయం ప్రకారం, తక్కువ ఫ్లోర్ ప్రైస్ కారణంగా స్వల్పకాలంలో LIC షేరుపై ఒత్తిడి కొనసాగవచ్చు.

అయితే OFS ప్రక్రియ పూర్తైన తర్వాత పెట్టుబడిదారుల స్పందన,సంస్థ ఆర్థిక పనితీరు,మార్కెట్ పరిస్థితులు వంటి అంశాల ఆధారంగా LIC షేరు భవిష్యత్తు దిశ స్పష్టమయ్యే అవకాశముందని వారు అంచనా వేస్తున్నారు.