Stock Market: స్వల్ప నష్టాల్లో ప్రారంభమైన దేశీయ మార్కెట్ సూచీలు.. నిఫ్టీ@ 25,456
ఈ వార్తాకథనం ఏంటి
సోమవారం ఆసియా మార్కెట్లలో నష్టాలు కనిపించడంతో, దాని ప్రభావం భారత స్టాక్ సూచీలపై కూడా పడింది. దీంతో మార్కెట్లు స్వల్ప నష్టాలతో కదలాడుతున్నాయి. ఉదయం 9:32 గంటల సమయంలో సెన్సెక్స్‌ 56 పాయింట్ల నష్టంతో 83,383 వద్ద కొనసాగగా, నిఫ్టీ 4 పాయింట్ల తగ్గుదలతో 25,456 వద్ద ట్రేడవుతోంది. డాలర్‌తో పోలిస్తే రూపాయి మారకం విలువ 85.63గా నమోదైంది. అమెరికా అధ్యక్షుడు ట్రంప్ తాజా ప్రకటన రూపాయి విలువపై ప్రభావం చూపింది. బ్రిక్స్‌ దేశాలు అమెరికా వ్యతిరేక విధానాలను అనుసరిస్తే, ఆ దేశాలపై అదనంగా 10 శాతం టారిఫ్‌లు విధిస్తామని ట్రంప్ హెచ్చరించారు. ఈ వ్యాఖ్యల నేపథ్యంలో రూపాయి విలువ బలహీనపడింది.
వివరాలు
అమెరికా-భారత్ ద్వైపాక్షిక వాణిజ్య చర్చల ఫలితాల ప్రభావం
నిఫ్టీ సూచీలో కొన్ని షేర్లు లాభాల్లో ఉండగా, మరికొన్ని నష్టాల్లో ఉన్నాయి. ట్రెంట్, హెచ్‌డీఎఫ్‌సీ లైఫ్, ఐషర్ మోటార్స్, హెచ్‌యూఎల్, ఆసియన్ పెయింట్స్ షేర్లు లాభంగా ట్రేడవుతున్నాయి. ఇతరవైపు భారత్ ఎలక్ట్రానిక్స్, టెక్ మహీంద్రా, హెచ్‌సీఎల్ టెక్నాలజీస్, ఎటర్నల్, హిందాల్కో షేర్లు నష్టాల్లో ఉన్నాయి. ప్రస్తుత మార్కెట్ పరిస్థితులపై రెండు ముఖ్యాంశాలు ప్రభావం చూపిస్తున్నాయి. అమెరికా-భారత్ ద్వైపాక్షిక వాణిజ్య చర్చల ఫలితాలు ఈ వారంలో వెల్లడి కానుండగా, దేశీయంగా ఏప్రిల్-జూన్ త్రైమాసిక ఫలితాల సీజన్ కూడా ప్రారంభం కానుంది. ఈ పరిస్థితుల నేపథ్యంలో పెట్టుబడిదారులు జాగ్రత్తగా వ్యవహరిస్తున్నారు.