Ola Electric Results: ఓలా ఎలక్ట్రిక్ ఫలితాలు.. నష్టాలు పెరిగినా.. షేరు ధర 16 శాతం పెరుగుదల !
ఈ వార్తాకథనం ఏంటి
ప్రముఖ ఎలక్ట్రిక్ వాహన తయారీ సంస్థ ఓలా ఎలక్ట్రిక్ 2025-26 ఆర్థిక సంవత్సరం తొలి త్రైమాసిక ఫలితాలను విడుదల చేసింది. ఈ కాలంలో కంపెనీ రూ.428 కోట్ల నికర నష్టం నమోదు చేసినట్లు వెల్లడించింది. గతేడాది ఇదే త్రైమాసికంలో రూ.347 కోట్ల నష్టం నమోదవగా, ఈసారి నష్టం మరింత పెరిగింది. అయినప్పటికీ కంపెనీ షేరు ధర పెరగడం విశేషంగా నిలిచింది. నష్టాలు పెరిగినా కంపెనీ లాభదాయకత దిశగా ప్రయాణిస్తోందన్న సంకేతాలు కనిపించడంతో.. షేరు ధరలో పాజిటివ్‌ ప్రభావం కనిపించిందని విశ్లేషకులు పేర్కొంటున్నారు.
వివరాలు
క్యూ4లో రూ.611 కోట్ల ఆదాయం
గతేడాది ఇదే కాలంతో పోలిస్తే ఆదాయం తగ్గింది. 2024 క్యూ1లో రూ.1644 కోట్ల ఆదాయం వచ్చిన ఓలా.. ఈ ఏడాది అదే త్రైమాసికంలో రూ.828 కోట్ల ఆదాయం మాత్రమే నమోదు చేసింది. అయితే, గత త్రైమాసికం (క్యూ4)తో పోలిస్తే ఆదాయం పెరగడం మరో ముఖ్యమైన అంశంగా నిలిచింది. క్యూ4లో రూ.611 కోట్ల ఆదాయం వచ్చిన నేపథ్యంలో, తాజాగా ముగిసిన క్యూ1లో ఇది 35.5 శాతం పెరిగి రూ.828 కోట్లకు చేరిందని కంపెనీ తెలిపింది. ఇక విక్రయాల విషయానికి వస్తే, గత త్రైమాసికంలో 51,375 యూనిట్ల విక్రయం జరిగినట్లు వెల్లడించగా.. తాజా త్రైమాసికంలో ఇది 68,192 యూనిట్లకు పెరిగిందని పేర్కొంది.
వివరాలు
మొత్తం ఖర్చులు నెలకు రూ.150 కోట్ల నుంచి రూ.130 కోట్లకు తగ్గించుకునే లక్ష్యం
జూన్‌ నెలలో పాజిటివ్‌ ఎబీటా సాధించామని ఓలా ప్రకటించింది. ప్రాజెక్ట్‌ లక్ష్యాన్ని దృష్టిలో పెట్టుకుని చేపట్టిన చర్యలతో నిర్వహణ ఖర్చులు గణనీయంగా తగ్గాయని వెల్లడించింది. నెలవారీ నిర్వహణ ఖర్చులు రూ.178 కోట్ల నుంచి రూ.105 కోట్లకు తగ్గించుకున్నట్లు చెప్పింది. మొత్తం ఖర్చులను నెలకు రూ.150 కోట్ల నుంచి రూ.130 కోట్లకు తగ్గించుకునే లక్ష్యంతో పనిచేస్తున్నట్లు పేర్కొంది. ప్రస్తుత ఆర్థిక సంవత్సరానికి కంపెనీ 3.25 లక్షల నుంచి 3.75 లక్షల వాహనాలు విక్రయించాలని లక్ష్యంగా పెట్టుకున్నట్లు తెలిపింది. దీని ద్వారా రూ.4200 కోట్ల నుంచి రూ.4700 కోట్ల ఆదాయం వస్తుందని అంచనా వేసింది. క్యూ2 నుంచి జనరేషన్‌-3 స్కూటర్లకు పీఎల్‌ఐ ప్రయోజనాలు అందనున్నట్లు తెలిపింది.
వివరాలు
దేశవ్యాప్తంగా 200 స్టోర్లలో రోడ్‌స్టర్‌ ఎక్స్‌ మోటార్‌సైకిల్
దీంతో స్థూల మార్జిన్లు 35-40 శాతం వరకు పెరిగే అవకాశం ఉందని పేర్కొంది. మొత్తం సంవత్సరానికి 5 శాతం ఎబీటా సాధించగలమని ఆశాభావం వ్యక్తంచేసింది. ప్రస్తుతం విక్రయిస్తున్న వాహనాల్లో జనరేషన్‌-3 మోడళ్లు 80 శాతం వరకు ఉన్నాయని కంపెనీ వివరించింది. ఈ స్కూటర్ల వల్ల స్థూల మార్జిన్లు పెరగడంతో పాటు వారంటీ క్లెయిమ్‌లు తగ్గనున్నట్లు తెలిపింది. దేశవ్యాప్తంగా 200 స్టోర్లలో రోడ్‌స్టర్‌ ఎక్స్‌ మోటార్‌సైకిల్ లభ్యమవుతోందని,రాబోయే పండగ సీజన్‌ నాటికి అందుబాటును మరింత విస్తరించనున్నట్లు పేర్కొంది.
వివరాలు
ఓలా షేరు 16 శాతం పెరిగి రూ.46.26 వద్ద ట్రేడవుతోంది
అదనంగా,రేర్ ఎర్త్స్ ఫ్రీ మోటార్లను అభివృద్ధి చేసినట్లు, ఇవి క్యూ3 నుంచి అందుబాటులోకి రాబోతున్నట్లు తెలిపింది. ఈ పరిణామాలన్నింటి నేపథ్యంలో లాభదాయకత దిశగా ఓలా అడుగులు వేస్తోందన్న అంచనాలతో బీఎస్‌ఈలో మధ్యాహ్నం 1 గంటకు ఓలా షేరు 16 శాతం పెరిగి రూ.46.26 వద్ద ట్రేడవుతుందని కంపెనీ పేర్కొంది.