Ola Electric: దేశవ్యాప్తంగా ఒకేరోజు 4,000 స్టోర్లను ప్రారంభించనున్న ఓలా
ఈ వార్తాకథనం ఏంటి
ప్రముఖ విద్యుత్ ద్విచక్ర వాహన తయారీ సంస్థ ఓలా ఎలక్ట్రిక్ (Ola Electric) తన రిటైల్ స్టోర్ల సంఖ్యను భారీగా పెంచేందుకు సిద్ధమవుతోంది. దేశవ్యాప్తంగా డిసెంబర్ చివరి నాటికి 4,000 స్టోర్లను అందుబాటులోకి తీసుకురావాలని నిర్ణయించినట్లు కంపెనీ సీఈఓ భవీశ్ అగర్వాల్ ప్రకటించారు. ప్రస్తుతం ఉన్న 800 స్టోర్లను ఈ ప్రణాళికలో భాగంగా 4,000కు పెంచుతున్నట్లు తెలిపారు.
వివరాలు
డిసెంబర్ 20న దేశవ్యాప్తంగా అన్ని స్టోర్లను ఒకేసారి ప్రారంభం
ఈ నిర్ణయంపై సోమవారం ఎక్స్ వేదికగా చేసిన ప్రకటనలో భవీశ్, "విద్యుత్ వాహన రంగంలో విప్లవాత్మక మార్పులు తీసుకురావడమే మా లక్ష్యం. వినియోగదారులకు మరింత చేరువకావడమే ఈ స్టోర్ల పెంపు వెనుక ఉన్న ముఖ్య ఉద్దేశ్యం. డిసెంబర్ 20న దేశవ్యాప్తంగా అన్ని స్టోర్లను ఒకేసారి ప్రారంభించనున్నాం. ఈ స్థాయిలో ఒకే రోజు ఇన్ని స్టోర్ల ప్రారంభం చేయడం ఇదే మొదటిసారి కావొచ్చు," అని పేర్కొన్నారు. ఈ స్టోర్లలో ఓలా ఎలక్ట్రిక్ సర్వీసులు కూడా అందుబాటులో ఉంటాయని వెల్లడించారు.
ట్విట్టర్ పోస్ట్ చేయండి
భవీశ్ అగర్వాల్ చేసిన ట్వీట్
Taking the Electric revolution to the next level this month.
— Bhavish Aggarwal (@bhash) December 2, 2024
Going from 800 stores right now to 4000 stores this month itself. Goal to be as close to our customers as possible.
All stores opening together on 20th Dec across India. Probably the biggest single day store opening…
వివరాలు
జాతీయ స్థాయిలో 10,000కు పైగా ఫిర్యాదులు
తాజాగా, విద్యుత్ వాహన విభాగంలో మార్కెట్ లీడర్‌గా ఉన్న ఓలా ఎలక్ట్రిక్ పలు విమర్శలకు గురైంది. ముఖ్యంగా విక్రయానంతర సేవల విషయంలో వినియోగదారుల నుంచి పెద్ద ఎత్తున ఫిర్యాదులు వచ్చాయి. జాతీయ స్థాయిలో 10,000కు పైగా ఫిర్యాదులు రాగా, దీనిపై సెంట్రల్ కన్జ్యూమర్ ప్రొటెక్షన్ అథారిటీ (CCPA) విచారణకు ఆదేశించింది. ఈ నేపథ్యంలో ఓలా ఎలక్ట్రిక్ తాజా ప్రకటనను విశేషంగా గమనించాల్సి ఉంది. ఈ ప్రకటనతో కంపెనీ షేర్లు కూడా మంచి ఫలితాలను అందించాయి. ఉదయం నష్టాల్లో ట్రేడవుతున్న ఓలా షేర్లు మధ్యాహ్నం 1:40కు 5% లాభంతో ₹91.67 వద్ద ట్రేడయ్యాయి.