Stock Market: ఈ ఏడాది నష్టాల నుంచి కోలుకున్న రూపాయి.. డాలర్‌ @ రూ.85.61

వ్రాసిన వారు Sirish Praharaju

Mar 25, 2025

01:34 pm

ఈ వార్తాకథనం ఏంటి

రూపాయి ప్రస్తుతం డాలర్‌తో పోల్చితే బలపడుతోంది. దిగుమతుల వ్యాపారులకు ఇది సానుకూల పరిణామం. విదేశాల్లో ఉన్నత విద్య చదువుతున్న విద్యార్థుల తల్లిదండ్రులకు కూడా ఇది ఉపశమనాన్ని అందిస్తోంది. గత ఏడు రోజుల్లో రూపాయి 154 పైసలు బలపడింది.గత శుక్రవారం 36 పైసలు, సోమవారం 37 పైసలు బలపడింది. ఫారిన్ ఎక్స్చేంజ్ మార్కెట్లో మారకపు విలువ సోమవారం ఇంటర్‌బ్యాంక్ ఫారిన్ ఎక్స్చేంజ్‌లో రూపాయి విలువ ₹85.93 వద్ద ప్రారంభమైంది. గరిష్ఠంగా ₹85.49, కనిష్ఠంగా ₹86.01 నమోదైంది. చివరికి రూపాయి విలువ ₹85.61 వద్ద స్థిరపడింది. 2024 చివర్లో రూపాయి విలువ ₹86.64 ఉండగా, ఇప్పుడు మరింత బలపడడం గమనార్హం. ఫిబ్రవరిలో రూపాయి విలువ 87.59 వద్ద ఉండగా, ప్రస్తుతం అది కోలుకుంటోంది.

వివరాలు

రూపాయి బలపడటానికి ప్రధాన కారణాలు

గత ఆరు నెలల్లో విదేశీ సంస్థాగత మదుపర్లు(FII)భారీగా విక్రయాలు చేయడంతో రూపాయి బలహీనపడింది. కానీ,ఈ మధ్యనే మార్కెట్‌లో తిరిగి పెట్టుబడులు పెట్టడం ప్రారంభించారు.గత వారంలో రెండు రోజుల్లోనే ₹10,000 కోట్ల పెట్టుబడులు వచ్చాయి. అక్టోబర్-డిసెంబర్ త్రైమాసికంలో భారత వృద్ధిరేటు మెరుగైంది.2024-25లో GDP వృద్ధి 6.2% - 6.4% నమోదవుతుందనే అంచనాలు ఉన్నాయి. FTSE (Financial Times Stock Exchange)All-World Indexలో భారతదేశానికి చెందిన 14 కంపెనీలు చేరాయి. ICICI బ్యాంక్, కోటక్ మహీంద్రా బ్యాంక్,జొమాటో తదితర కంపెనీల'వెయిటేజీ' పెరగడంతో భవిష్యత్తులో 1.4-1.6 బిలియన్ డాలర్ల పెట్టుబడులు రావచ్చని అంచనా. భారత రిజర్వ్ బ్యాంక్ 10బిలియన్ డాలర్ల రూపాయి క్రయవిక్రయాల సర్దుబాటు, 3 బిలియన్ డాలర్ల విక్రయాన్ని చేపట్టడం వల్ల నగదు లభ్యత పెరిగింది.

వివరాలు

భవిష్యత్తులో రూపాయి స్థితి

నిపుణుల అభిప్రాయం ప్రకారం, రూపాయి మరింత బలపడినా, కొంతమేర వెనకడుగు వేసే అవకాశం ఉంది. అమెరికా ప్రతినిధుల భారత్ సందర్శన, విదేశీ పెట్టుబడులు పెరగడం వంటి అంశాలు రూపాయి బలపడేందుకు తోడ్పడుతున్నాయి. HDFC సెక్యూరిటీస్ రీసెర్చ్ అనలిస్ట్ దిలీప్ పర్మార్ ప్రకారం, రూపాయికి ₹85.20 వద్ద నిరోధం, ₹86.05 వద్ద మద్దతు ఉంది. రష్యా-ఉక్రెయిన్ యుద్ధ పరిణామాలు కూడా రూపాయిపై ప్రభావం చూపుతున్నాయి.

వివరాలు

మార్కెట్ కోలుకుంటోంది

ఈ ఏడాది జనవరిలో వచ్చిన నష్టాలను దేశీయ మార్కెట్లు ఈ నెలలో పూడ్చుకుంటున్నాయి. గత ఆరు ట్రేడింగ్ రోజుల్లో సూచీలు లాభపడ్డాయి. మార్చి 17 నుండి సెన్సెక్స్ 4,155.47 పాయింట్లు (5.62%), నిఫ్టీ 1,261.15 పాయింట్లు (5.63%) పెరిగాయి. జనవరి-ఫిబ్రవరిలో సెన్సెక్స్ మొత్తం 4,940.91 పాయింట్లు నష్టపోయినా, ఈ నెలలో ఇప్పటికే 4,786.28 పాయింట్లు కోలుకుంది. ప్రస్తుతం రూపాయి తిరిగి బలపడుతోంది. విదేశీ పెట్టుబడులు పెరగడం, దేశ ఆర్థిక వ్యవస్థ మెరుగవడం వంటి కారణాలతో ఇది మరింత స్థిరపడే అవకాశం ఉంది. అయితే, అంతర్జాతీయ పరిణామాలు ఎలా మారతాయో నిర్దిష్టంగా చెప్పడం కష్టం.