SEBI: SME IPOలకు సెబీ సులభతర నిబంధనలు.. కీలక మార్పులకు కసరత్తు

వ్రాసిన వారు Sirish Praharaju

Aug 13, 2026

11:26 am

ఈ వార్తాకథనం ఏంటి

భారత మార్కెట్ల నియంత్రణ సంస్థ సెబీ (SEBI) చిన్న, సూక్ష్మ కంపెనీలకు సంబంధించిన IPO నిబంధనల్లో కీలక మార్పులు తీసుకురావాలని యోచిస్తోంది. మరిన్ని మైక్రో క్యాప్ కంపెనీలు స్టాక్ మార్కెట్లోకి వచ్చేలా ప్రోత్సహించడం, చిన్న సంస్థల్లో పెట్టుబడిదారుల భాగస్వామ్యాన్ని పెంచడం ఈ ప్రతిపాదిత సంస్కరణల ప్రధాన ఉద్దేశం. ఈ మార్పులు అమల్లోకి వస్తే 2012లో ప్రత్యేక SME ప్లాట్‌ఫామ్‌లు ప్రారంభమైన తర్వాత ఈ మార్కెట్లో జరిగే అతిపెద్ద మార్పుగా నిలవనున్నాయి.

వివరాలు

రూ.4,000 కోట్ల వరకు కంపెనీలకు SME IPO అవకాశం?

ప్రస్తుతం సాధారణంగా రూ.500 కోట్లలోపు విలువ కలిగిన కంపెనీలు SME ప్లాట్‌ఫామ్‌ల ద్వారా పబ్లిక్ ఇష్యూకు వస్తున్నాయి.

అయితే సెబీ ప్రతిపాదిస్తున్న మార్పుల ప్రకారం గరిష్ఠంగా రూ.4,000 కోట్ల మార్కెట్ విలువ ఉన్న కంపెనీలు కూడా SME ప్లాట్‌ఫామ్‌లో IPOకు వచ్చే అవకాశం కల్పించనున్నారు.

వేగంగా పెరుగుతున్న మైక్రో-IPO విభాగంలో షేర్ల ధరలను కృత్రిమంగా పెంచడం, మోసాలకు సంబంధించిన ఆందోళనలు వ్యక్తమైన నేపథ్యంలో రెండేళ్లలోపే సెబీ నిబంధనలను కఠినతరం చేసింది.

ఇప్పుడు మరోసారి నిబంధనలను సవరించే దిశగా అడుగులు వేస్తోంది.

వివరాలు

SME కంపెనీలకు లిస్టింగ్‌లో మరింత వెసులుబాటు

SME ప్లాట్‌ఫామ్‌లో లిస్టింగ్‌కు వచ్చే కంపెనీల చెల్లించిన మూలధనం (Paid-up Capital) పరిమితిని కూడా రూ.25కోట్ల నుంచి రూ.100కోట్లకు పెంచే అంశాన్ని సెబీ పరిశీలిస్తోంది.

ఈ మార్పు అమల్లోకి వస్తే రూ.1,000కోట్ల నుంచి రూ.4,000కోట్ల మధ్య మార్కెట్ విలువ ఉన్న కంపెనీలకు SME ప్లాట్‌ఫామ్ లేదా ప్రధాన బోర్డు(Mainboard)లో లిస్టింగ్ చేసుకునే అవకాశం ఉంటుంది.

అలాగే SME షేర్లలో కనీస ట్రేడింగ్ పరిమాణం నిబంధనను తొలగించే అంశంపైనా సెబీ ఆలోచిస్తోంది.

ప్రస్తుతం పెట్టుబడిదారులు కనీసం రూ.2లక్షల విలువైన షేర్లలోనే బిడ్లు వేయాల్సి ఉంటుంది.

చిన్న పెట్టుబడిదారులకు ఇది ఇబ్బందిగా మారుతోంది.ఈ నిబంధన తొలగిస్తే తక్కువ మొత్తంలోనూ SME షేర్లను కొనుగోలు చేయడం,విక్రయించడం సాధ్యమవుతుంది.

దీంతో చిన్న పెట్టుబడిదారుల భాగస్వామ్యం పెరిగే అవకాశం ఉంది.

వివరాలు

SME షేర్ల ట్రేడింగ్‌పై సెబీ కీలక ప్రతిపాదన

SME షేర్లలో లిక్విడిటీని పెంచేందుకు ప్రస్తుతం మార్కెట్ మేకర్లు నిరంతరం కొనుగోలు, విక్రయ ధరలను అందుబాటులో ఉంచాల్సి ఉంటుంది.

అయితే ఈ విధానం కంపెనీలకు అదనపు వ్యయాన్ని పెంచుతోంది.

ప్రతిపాదిత సంస్కరణల్లో భాగంగా కనీస ట్రేడింగ్ పరిమాణంతో పాటు మార్కెట్ మేకర్లకు సంబంధించిన ఈ తప్పనిసరి నిబంధనలను కూడా తొలగించాలని సెబీ భావిస్తోంది.

ఈ మార్పులు అమల్లోకి వస్తే SME మార్కెట్లో కంపెనీల లిస్టింగ్ ప్రక్రియ మరింత సులభతరం కావడంతో పాటు పెట్టుబడిదారులకు కూడా ట్రేడింగ్‌లో వెసులుబాటు కలగనుంది.