Stock market: అమెరికా సుంకాల ఎఫెక్ట్: భారీ నష్టాల్లో దేశీయ మార్కెట్ సూచీలు.. నిఫ్టీ@ 24,500
ఈ వార్తాకథనం ఏంటి
దేశీయ స్టాక్ మార్కెట్లు ఈ రోజు భారీ నష్టాలతో ముగిశాయి. భారత్‌పై అమెరికా విధించిన సుంకాలు అమల్లోకి రావడం సెంటిమెంట్‌ను దెబ్బతీసింది. దీనితోపాటు, అంతర్జాతీయ మార్కెట్ల నుంచి వచ్చిన బలహీన సంకేతాలు, విదేశీ మదుపర్లు చేసిన అమ్మకాలు కూడా దేశీయ మార్కెట్లపై ఒత్తిడి పెంచాయి. ముఖ్యంగా బ్యాంకింగ్ రంగంలోని స్టాక్స్‌లో భారీ అమ్మకాలు జరగడంతో సూచీలు పడిపోవడంలో ప్రధాన పాత్ర పోషించాయి. ఫలితంగా, సెన్సెక్స్ దాదాపు 700 పాయింట్ల మేర కోల్పోయి, నిఫ్టీ 24,500 స్థాయికి చేరింది. అంతే కాక, బీఎస్‌ఈలో నమోదైన కంపెనీల మొత్తం మార్కెట్ విలువ దాదాపు రూ.4 లక్షల కోట్ల నుంచి రూ.445 లక్షల కోట్లకు తగ్గింది.
వివరాలు
సెన్సెక్స్, నిఫ్టీ ప్రదర్శన
సెన్సెక్స్ ఉదయం 80,754.66 పాయింట్ల వద్ద ప్రారంభమై, క్రితం ముగింపైన 80,786.54 పాయింట్లతో పోల్చితే నష్టంలో ప్రారంభమైంది. రోజంతా నష్టాల్లోనే కొనసాగాయి. ఇంట్రాడేలో సెన్సెక్స్ 80,013.02 పాయింట్ల వద్ద కనిష్ట స్థాయిని తాకింది. చివరికి 705.97 పాయింట్ల నష్టంతో 80,080.57 వద్ద స్థిరపడింది. నిఫ్టీ కూడా 211.15 పాయింట్ల నష్టంతో 24,500.90 వద్ద ముగిసింది. ఈ రోజు డాలరుతో రూపాయి మారకం విలువ 87.63 వద్ద కొనసాగింది.
వివరాలు
ప్రధాన కంపెనీల ప్రదర్శన
సెన్సెక్స్ 30 సూచీలో హెచ్‌సీఎల్ టెక్నాలజీస్, ఇన్ఫోసిస్, పవర్‌గ్రిడ్ కార్పొరేషన్, టీసీఎస్, హెచ్‌డీఎఫ్‌సీ బ్యాంక్ వంటి కంపెనీలు ప్రధానంగా నష్టాలు చవిచూశాయి. మరోవైపు, టైటాన్, ఎల్‌అండ్‌టీ, మారుతీ సుజుకీ, యాక్సిస్ బ్యాంక్, రిలయన్స్ షేర్లు లాభంతో ముగిశాయి. ఆసియా మార్కెట్లు మిశ్రమ ధోరణిలో కొనసాగగా, యూరప్ మార్కెట్లు కూడా అదే ధోరణిని ప్రదర్శిస్తున్నాయి. అంతర్జాతీయంగా, బ్రెంట్ క్రూడ్ ధర 67.79 డాలర్ల వద్ద కొనసాగుతుంది, బంగారం ఔన్సు ధర 3,397 డాలర్ల వద్ద ట్రేడవుతోంది.
వివరాలు
కారణాలు ఇవీ..
ఈ నష్టాలకు ప్రధాన కారణంగా అమెరికా అధ్యక్షుడు ట్రంప్ విధించిన 25 శాతం అదనపు సుంకాలు బుధవారం నుంచి అమల్లోకి వచ్చాయి. ఇవి భారత ఎగుమతులపై నేరుగా ప్రభావం చూపడం వల్ల, దేశీయ మార్కెట్లు నష్టపోయాయి. అలాగే, విదేశీ సంస్థాగత మదుపర్ల అమ్మకాలు కూడా కొనసాగుతున్నాయి. ఆగస్టు 26న వీరు రూ.6,500 కోట్ల విలువైన షేర్లను విక్రయించారు. గడిచిన మూడు సెషన్లలో ఈ మదుపర్లు విక్రయకారులుగా కొనసాగడం కూడా మార్కెట్లపై నెగటివ్ ప్రభావాన్ని చూపింది.