Sundar Pichai: బిలియనీర్‌ క్లబ్‌లోకి సుందర్‌ పిచాయ్‌.. అయన ఆస్తి విలువ ఎంతంటే..
ఈ వార్తాకథనం ఏంటి
టెక్నాలజీ ప్రపంచంలో అతిపెద్ద సంస్థలలో ఒకటైన గూగుల్‌ మాతృసంస్థ ఆల్ఫాబెట్‌ సీఈఓగా కొనసాగుతున్న భారత మూలాలు కలిగిన అమెరికన్‌ నాయకుడు సుందర్‌ పిచాయ్‌ (Sundar Pichai) ఒక అరుదైన ఘనతను అందుకున్నారు. గడచిన దశాబ్దకాలంగా ఆల్ఫాబెట్‌కు సీఈఓగా సేవలందిస్తున్న ఆయన, తాజాగా బిలియనీర్ల జాబితాలోకి ప్రవేశించారు. ప్రస్తుతం పిచాయ్‌ నికర ఆస్తి విలువ 1.1 బిలియన్‌ అమెరికన్‌ డాలర్లను మించిందని బ్లూమ్‌బర్గ్‌ బిలియనీర్స్‌ సూచీ వెల్లడించింది. 2023 సంవత్సరం నుంచి ఆల్ఫాబెట్‌ కంపెనీ షేర్లు మార్కెట్‌లో సుస్థిరంగా రాణిస్తున్నాయి. ఈ రెండు సంవత్సరాల కాలంలో సంస్థ మార్కెట్‌ విలువ మరొక ట్రిలియన్‌ డాలర్ల మేర పెరిగి 2 ట్రిలియన్‌ డాలర్లకు అధిగమించింది.
వివరాలు
ఆయన ఆస్తి విలువ 1.2 బిలియన్‌ డాలర్లు
తాజాగా గురువారం జరిగిన ట్రేడింగ్‌లో ఆల్ఫాబెట్‌ షేర్లు ఏకంగా 4.1 శాతం మేర లాభపడ్డాయి. దీనివల్ల సీఈఓ పిచాయ్‌ సంపద 1.1 బిలియన్‌ డాలర్లకు పెరిగిందని బ్లూమ్‌బర్గ్‌ తన నివేదికలో పేర్కొంది. అదే సమయంలో ఫోర్బ్స్‌ బిలియనీర్స్‌ సూచీలో ఆయన ఆస్తి విలువ 1.2 బిలియన్‌ డాలర్లుగా నమోదైంది. ఒక కంపెనీ వ్యవస్థాపకుడు కాకపోయినా,కేవలం సీఈఓ పదవిలో ఉండి బిలియనీర్స్‌ క్లబ్‌లో చేరడం చాలా అరుదైన సంఘటనగా బ్లూమ్‌బర్గ్‌ విశ్లేషించింది. మెటా సంస్థ అధినేత మార్క్‌ జుకర్‌బర్గ్‌, ఎన్విడియా చీఫ్‌ జెన్సెన్‌ హువాంగ్‌ వంటి వారు తమ కంపెనీలను స్థాపించి వ్యవస్థాపక వాటాలను కలిగి ఉన్నారు. అందువల్ల వారి ఆస్తి విలువలు అత్యధికంగా ఉన్నాయి.
వివరాలు
2004లో గూగుల్‌లో సాధారణ ఉద్యోగి
ఇదిలా ఉండగా, ఆల్ఫాబెట్‌ బుధవారం నాడు తన రెండో త్రైమాసిక ఆర్థిక ఫలితాలను వెల్లడించింది. ఈ త్రైమాసికంలో కంపెనీ ఆదాయం 96.4 బిలియన్‌ డాలర్లుగా నమోదవగా, లాభాలు 28.2 బిలియన్‌ డాలర్లను తాకాయి. తమిళనాడులోని ఓ సాధారణ మధ్య తరగతి కుటుంబంలో జన్మించిన సుందర్‌ పిచాయ్‌, 1993లో స్టాన్‌ఫోర్డ్‌ యూనివర్సిటీలో స్కాలర్‌షిప్‌ ద్వారా ప్రవేశం పొందారు. అక్కడ తన విద్యాభ్యాసం పూర్తి చేసిన అనంతరం, 2004లో గూగుల్‌లో సాధారణ ఉద్యోగిగా చేరారు.
వివరాలు
2015లో గూగుల్‌ సీఈఓగా పిచాయ్‌
ఆయన కృషి, దృఢ సంకల్పంతో సంస్థ అభివృద్ధికి ఎంతో తోడ్పడాయి. గూగుల్‌ క్రోమ్, ఆండ్రాయిడ్, గూగుల్‌ డ్రైవ్‌ వంటి అనేక వినూత్న ప్రాజెక్టుల వెనుక ఆయన దిశానిర్దేశక ఆలోచనలు కీలక పాత్ర పోషించాయి. ఈ కృషికి గుర్తింపుగా 2015లో పిచాయ్‌ను గూగుల్‌ సీఈఓగా నియమించారు. ఈ ఏడాది ఆగస్టు నాటికి ఆయన సీఈఓగా పదవిని చేపట్టి 10 ఏళ్లను పూర్తి చేసుకోనున్నారు.