Trump: ఎన్విడియా సీఈఓగా కొనసాగాలని జెన్సన్ హువాంగ్‌కు ట్రంప్ ఫోన్
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్.. ఎన్విడియా సీఈఓ జెన్సన్ హువాంగ్‌కు స్వయంగా ఫోన్ చేసి, తన పదవిని కాపాడుకునేందుకు పోరాడాలని సూచించినట్లు న్యూయార్క్ టైమ్స్ వెల్లడించింది. గూఢచర్యం ఆరోపణలతో వివాదం ముదురుతున్న సమయంలో ఈ ఫోన్ కాల్ జరిగినట్లు తెలిపింది. చైనా గూఢచారిగా అనుమానిస్తున్న ఓ మహిళతో హువాంగ్‌కు సంబంధం ఉందని అమెరికా నిఘా సంస్థలు నిర్ధారించినప్పటికీ ట్రంప్ మాత్రం ఆయనకు బహిరంగంగా మద్దతు కొనసాగించారు. ఈ పరిణామాలు చోటుచేసుకున్న కొద్ది రోజులకే హువాంగ్ ఎన్విడియా సీఈఓ పదవి నుంచి వైదొలిగినట్లు వార్తలు వెలువడ్డాయి.
వివరాలు
సీఈఓ పదవి నుంచి వైదొలగిన హువాంగ్
ఎన్విడియా గురువారం హువాంగ్ సీఈఓ పదవి నుంచి వైదొలిగినట్లు ప్రకటించింది.
ఆలిస్ హువాంగ్ అనే మహిళతో వివాహేతర సంబంధం ఉందని, అలాగే సంస్థలో పనిచేసే మరో ఉద్యోగితోనూ ఆయనకు సంబంధం ఉందని ఆరోపణలు రావడం ఈ పరిణామాలకు కారణమైంది.
ఆలిస్‌తో హువాంగ్‌కు ఉన్న సంబంధం వల్ల దేశ భద్రతకు ముప్పు వాటిల్లే అవకాశముందని ట్రంప్‌ను అధికారులు కనీసం రెండుసార్లు హెచ్చరించినట్లు సమాచారం.
గతేడాది, ఈ ఏడాది వసంతకాలంలో ఈ విషయాన్ని ఆయన దృష్టికి తీసుకెళ్లినప్పటికీ ట్రంప్ ఎలాంటి చర్యలు తీసుకోలేదు.
వివరాలు
హువాంగ్ వైదొలగితే మార్కెట్లపై ప్రభావం ఉంటుందని ట్రంప్ ఆందోళన
హువాంగ్ పదవి నుంచి తప్పుకుంటే ఆ ప్రభావం ఆర్థిక మార్కెట్లపై ఎలా ఉంటుందన్న విషయంపై ట్రంప్ ప్రత్యేకంగా ఆందోళన చెందారు.
ఎన్విడియా బోర్డు ఆయన స్థానంలో మరో వ్యక్తిని నియమించే ఆలోచనలో ఉందని వార్తలు వచ్చినప్పుడు.. ఆ నిర్ణయం ఆర్థిక మార్కెట్లపై ఎలాంటి ప్రభావం చూపుతుందని తన సన్నిహితులను అడిగినట్లు తెలుస్తోంది.
దీనివల్ల మార్కెట్లు భారీగా పడిపోయే ప్రమాదం ఉందని ఆయన భయపడ్డారు.
హువాంగ్‌కు ట్రంప్ మద్దతు ఇవ్వడానికి ఆయనతో పెరుగుతున్న వ్యక్తిగత అనుబంధం ఒక కారణమని సలహాదారులు భావించారు.
అంతేకాకుండా ఈ శతాబ్దంలో కీలకమైన సాంకేతిక రంగాన్ని తీర్చిదిద్దుతున్న హువాంగ్.. పారిశ్రామిక దిగ్గజం హెన్రీ ఫోర్డ్‌తో సమానమని ట్రంప్ అభిప్రాయపడినట్లు సమాచారం.
వివరాలు
ట్రంప్‌తో హువాంగ్‌కు సాన్నిహిత్యం ఎలా పెరిగింది?
హువాంగ్‌కు ట్రంప్‌తో సంబంధాలు ఇటీవలే బలపడ్డాయి. గతంలో ఆయనకు వాషింగ్టన్ రాజకీయ వర్గాల్లో పెద్దగా పరిచయాలు లేవు.
రాజకీయ ప్రచారాలకు విరాళాలు ఇవ్వడం, లాబీయింగ్ చేయడం వంటి కార్యకలాపాల్లోనూ పెద్దగా పాల్గొనేవారు కాదు.
అయితే బైడెన్ ప్రభుత్వం చిప్‌ల ఎగుమతులపై ఆంక్షలు విధించిన తర్వాత హువాంగ్ అమెరికా ప్రభుత్వంతో సంబంధాలు పెంచుకునేందుకు ప్రయత్నించారు.
2024 చివరి నాటికి టెక్నాలజీ రంగంలో హువాంగ్ ప్రాధాన్యాన్ని ట్రంప్ గుర్తించారు.
అధునాతన ఏఐ మోడళ్లకు శిక్షణ ఇచ్చేందుకు ఉపయోగించే చిప్‌ల మార్కెట్‌లో కనీసం 80 శాతం వాటా ఎన్విడియా చేతిలో ఉండటమే ఇందుకు కారణం.
వివరాలు
చైనాకు చిప్‌ల విక్రయాలపై ట్రంప్‌ను ఒప్పించిన హువాంగ్
చైనాకు సెమీకండక్టర్ చిప్‌ల ఎగుమతుల విషయంలో ట్రంప్ నిర్ణయాలను ప్రభావితం చేయడంలోనూ హువాంగ్ కీలక పాత్ర పోషించారు.
చైనాకు కూడా ఎన్విడియా చిప్‌లను విస్తృతంగా విక్రయించాలని ఆయన సూచించారు.
తద్వారా ఇతర దేశాలు చైనా సాంకేతికతపై ఆధారపడకుండా అమెరికా టెక్నాలజీతో తమ ఏఐ వ్యవస్థలను అభివృద్ధి చేసుకోగలవని వాదించారు.
ట్రంప్ ఏఐ, క్రిప్టోకరెన్సీ సలహాదారు డేవిడ్ సాక్స్ కూడా ఈ వాదనకు మద్దతు ఇచ్చారు.
చైనాకు చిప్‌ల విక్రయాలను వ్యతిరేకిస్తున్న మాగా (మేక్ అమెరికా గ్రేట్ అగైన్) ఉద్యమంలోని నేతల అభ్యంతరాలు ఉన్నప్పటికీ.. కొన్ని రకాల చిప్‌లను చైనాకు విక్రయించేందుకు ట్రంప్ అంగీకరించేలా చేయడంలో డేవిడ్ సాక్స్ కీలక పాత్ర పోషించినట్లు సమాచారం.