Ola-Uber: ఉబర్, ఓలా సంస్థలకు కేంద్రం నోటీసులు
ఈ వార్తాకథనం ఏంటి
యాప్ ఆధారంగా క్యాబ్ సర్వీసులు అందిస్తున్న ఉబర్ (Uber), ఓలా (OLA) సంస్థలపై ఫిర్యాదులు పెరుగుతున్న నేపథ్యంలో, కేంద్ర వినియోగదారుల మంత్రిత్వశాఖ (Consumer Affairs) స్పందించింది.
ఈ రెండు సంస్థలకు నోటీసులు జారీ చేసింది.
వినియోగదారుల ఫిర్యాదుల ప్రకారం, ఈ యాప్‌లు ఫోన్ మోడల్‌ను బట్టి ఛార్జీలను నిర్ణయిస్తున్నాయన్న ఆరోపణలు చాలాకాలంగా ఉన్నాయి.
ఆండ్రాయిడ్, ఐఓఎస్ ఫోన్‌లతో పాటు, ఫోన్ ధర ఆధారంగా కూడా ఛార్జీల్లో మార్పులు ఉన్నాయని పలువురు సోషల్ మీడియాలో ఆవేదన వ్యక్తం చేశారు.
ఈ నేపథ్యంలో, ఈ ఆరోపణలపై పూర్తి వివరణ ఇవ్వాలని ఉబర్, ఓలా సంస్థలను కేంద్రం ఆదేశించింది.
వివరాలు
కేంద్ర వినియోగదారుల రక్షణ సంస్థ దర్యాప్తు
అలాగే, ఒకే రకం సర్వీసుకు ఈ రెండు సంస్థలు వేర్వేరు ఛార్జీలు వసూలు చేస్తున్నాయని కొందరు ఫిర్యాదు చేశారు.
ఈ అంశాన్ని సీరియస్‌గా పరిగణించిన కేంద్ర వినియోగదారుల రక్షణ సంస్థ (సీసీపీఏ) ఈ విషయంపై దర్యాప్తు ప్రారంభించింది.
ఒకే రకం సేవకు వేర్వేరు ధరలు ఎలా నిర్ణయిస్తారో, ఈ ధరల్లో వ్యత్యాసానికి కారణాలు ఏమిటో వివరణ ఇవ్వాలని సీసీపీఏ స్పష్టం చేసింది.
ఛార్జీల విషయంలో పారదర్శకతకు ప్రాముఖ్యత ఇవ్వాలని, నిజాయితీతో కూడిన వివరణ అందించాలని పేర్కొంది.
వివరాలు
రిషభ్ సింగ్ పోస్ట్ వైరల్‌
ఇటీవల, ఢిల్లీకి చెందిన రిషభ్ సింగ్ అనే వ్యక్తి తన అనుభవాన్ని సోషల్ మీడియాలో పంచుకోవడం వైరల్‌గా మారింది.
ఉబర్ సంస్థ కేవలం ఫోన్ మోడల్ ఆధారంగా మాత్రమే కాకుండా, ఫోన్‌లో బ్యాటరీ శాతం ఆధారంగా కూడా ఛార్జీల్లో తేడాలు చూపిస్తోందని ఆయన ఆరోపించారు.
ఆయన తన పరిశీలన కోసం రెండు ఆండ్రాయిడ్ , రెండు ఐఓఎస్ డివైజ్‌లను ఉపయోగించి, అన్ని డివైజ్‌లలో ఒకే అకౌంట్‌తో లాగిన్ అయ్యి, ఒకే ప్రదేశానికి రైడ్ బుక్ చేయగా ఛార్జీల్లో తేడా కనిపించిందని తెలిపారు.
ఈ ఆరోపణలు సోషల్ మీడియాలో పెద్ద చర్చకు దారితీశాయి. ఫలితంగా, ఈ విషయంపై కేంద్రం చర్యలు చేపట్టేందుకు సిద్ధమైంది.