USA: భారత మార్కెట్లోకి టెస్లా ప్రవేశం.. కీలక వాణిజ్య చర్చలు ప్రారంభం
ఈ వార్తాకథనం ఏంటి
ఎలాన్ మస్క్ నేతృత్వంలోని టెస్లా భారత మార్కెట్లోకి అడుగుపెట్టేందుకు సన్నాహాలు చేస్తున్న వేళ, ఆటో మొబైల్ రంగంపై ప్రభావం చూపే కీలక నిర్ణయాలు వెలువడే అవకాశం ఉంది. తాజాగా, అమెరికా నుంచి దిగుమతి అయ్యే కార్లపై సుంకాలను పూర్తిగా తొలగించే దిశగా రెండు దేశాల మధ్య వాణిజ్య ఒప్పందంపై చర్చలు కొనసాగుతున్నాయి. అయితే, భారత్ ఈ విషయంలో తక్షణ నిర్ణయం తీసుకోవడంపై ఆచితూచి స్పందిస్తోంది. త్వరలో భారత్-అమెరికా అధికారుల మధ్య కీలక వాణిజ్య చర్చలు జరగనున్నాయి. ఈ ప్రక్రియలో ఆటోమొబైల్ రంగానికి సంబంధించిన టారిఫ్‌లు ప్రధాన అంశంగా మారనున్నట్లు ఓ అంతర్జాతీయ వార్తా సంస్థ వెల్లడించింది. ఈ నిర్ణయాలు టెస్లా భారత మార్కెట్లోకి ప్రవేశించే మార్గాన్ని సులభతరం చేయగలవని అంచనా వేస్తున్నారు.
వివరాలు
భారత ప్రభుత్వం దిగుమతి అయ్యే కార్లపై 110% టారిఫ్
ప్రస్తుతం,భారత ప్రభుత్వం దిగుమతి అయ్యే కార్లపై 110% టారిఫ్ విధిస్తోంది. ఈ విధానం గురించి ఎలాన్ మస్క్ గతంలో పలుమార్లు తన అసంతృప్తిని బహిరంగంగా వ్యక్తపరిచాడు. భారత్‌ను ప్రపంచంలోనే అత్యధిక టారిఫ్ విధించే దేశంగా అభివర్ణించిన ఆయన,ఈ విధానాన్ని సవాలు చేస్తున్నాడు. తాజాగా,అమెరికాలో డోజ్ విభాగానికి నాయకత్వం వహిస్తున్న మస్క్,అధ్యక్షుడు డొనాల్డ్ ట్రంప్‌తో సన్నిహిత సంబంధాలు కొనసాగిస్తున్నట్లు తెలుస్తోంది. ఇక ట్రంప్ కూడా భారత ప్రభుత్వాన్ని ఆటోమొబైల్ టారిఫ్‌ల విషయంలో తీవ్రమైన విమర్శలు చేస్తున్నారు. ఇటీవల అమెరికా కాంగ్రెస్ సమావేశంలో మాట్లాడుతూ, భారతదేశంపై ప్రతీకార సుంకాలు విధించనున్నట్లు హెచ్చరించారు.
వివరాలు
ఆటోమొబైల్ రంగంలో 'జీరో టారిఫ్'
ఈ నేపథ్యంలో, అమెరికా వాణిజ్య వర్గాలు భారత్‌లో పలు రంగాలలో సుంకాలను తొలగించాలనే డిమాండ్‌ను ముందుకు తీసుకొస్తున్నాయి. ఆటోమొబైల్ రంగంలో 'జీరో టారిఫ్' విధించే అవకాశం ఉందని పరిశీలకులు భావిస్తున్నారు. భారత్ అమెరికా సుంకాలపై సున్నితంగా స్పందిస్తోంది. దేశీయ పరిశ్రమల ప్రయోజనాలను దృష్టిలో ఉంచుకొని, ఈ అంశంపై సమగ్రమైన విధానం రూపొందించేందుకు ప్రయత్నిస్తోంది. ఇటీవల జరిగిన ట్రంప్-మోదీ భేటీ సందర్భంగా కూడా టారిఫ్‌లు, స్వేచ్ఛా వాణిజ్య ఒప్పందాలు ప్రధాన చర్చా అంశాలుగా నిలిచాయి. ఈ సందర్భంగా, రెండు దేశాల మధ్య వాణిజ్య పరిమాణాన్ని 500 బిలియన్ డాలర్లకు పెంచే లక్ష్యాన్ని ముందుకు పెట్టుకున్నారు.
వివరాలు
30 రకాల దిగుమతులపై సుంకాలను తగ్గించిన భారత్
ప్రస్తుతం, వాణిజ్య మంత్రి పీయూష్ గోయెల్‌ ఒక వారం పాటు అమెరికా పర్యటనలో ఉండనున్నారు. ఈ ప్రయాణంలో ఆయన అమెరికా వాణిజ్య మంత్రి హువార్డ్ లుట్నిక్‌తో సమావేశమై, వాణిజ్య ప్రతినిధి గ్రీర్‌తో చర్చలు జరపనున్నారు. భారతదేశంలో ప్రతి సంవత్సరం సుమారు 40 లక్షల కార్లు అమ్ముడవుతున్నాయి. దేశీయ ఆటోమొబైల్ కంపెనీలకు ఇది అత్యంత రక్షణ కల్పించే మార్కెట్‌గా మారింది. ఇదిలా ఉండగా, భారత్ ఇటీవల 30 రకాల దిగుమతులపై సుంకాలను తగ్గించింది. వీటిలో అధిక స్థాయి మోటార్ సైకిళ్లు కూడా ఉన్నాయి.