Income tax in Budget 2025: ఈసారైనా సెక్షన్‌ 80డిపై ఇస్తున్న మినహాయింపు పెంచుతారా?

వ్రాసిన వారు Sirish Praharaju

Jan 24, 2025

02:43 pm

ఈ వార్తాకథనం ఏంటి

తీవ్ర అనారోగ్య పరిస్థితుల్లో వైద్య ఖర్చుల భారాన్ని తగ్గించడంలో ఆరోగ్య బీమా (హెల్త్ ఇన్సూరెన్స్) ప్రధాన పాత్ర పోషిస్తుంది. ప్రత్యేకంగా, భారీగా పెరుగుతున్న వైద్య ఖర్చులను జయించాలంటే ప్రతి కుటుంబానికీ ఆరోగ్య బీమా ఉండటం అత్యవసరమైంది. ఈ అవసరాన్ని గుర్తించిన కేంద్ర ప్రభుత్వం, ఆరోగ్య బీమాకు చెల్లించే ప్రీమియంపై పన్ను మినహాయింపులను అందిస్తూ ప్రోత్సహిస్తోంది. అయితే, ప్రస్తుత మినహాయింపు పరిమితి తక్కువగా ఉండటంతో, దానిని పెంచాలని సాధారణ ప్రజలు, బీమా సంస్థలు అభ్యర్థిస్తున్నారు. 2025 బడ్జెట్ (ఫిబ్రవరి 1) ద్వారా ఈ డిమాండును నెరవేర్చడం అవసరమని నిపుణులు అభిప్రాయపడుతున్నారు.

వివరాలు

సెక్షన్ 80డి పరిమితి వివరాలు

ఆరోగ్య బీమా ప్రీమియం చెల్లింపులపై ఆదాయపు పన్ను చట్టంలోని సెక్షన్ 80డి కింద మినహాయింపు పొందవచ్చు. 60 ఏళ్ల లోపు వ్యక్తులు: భార్యా పిల్లల పేరుపై తీసుకునే పాలసీలకు గరిష్ఠంగా ₹25,000 వరకు మినహాయింపు. 60 ఏళ్లు పైబడినవారు: ఈ పరిమితి ₹50,000. తల్లిదండ్రుల పేరిట పాలసీలు: అదనంగా ₹25,000 (వయసు 60 ఏళ్లు దాటితే ₹50,000). ఈ విధంగా, గరిష్ఠంగా ₹1,00,000 వరకు పన్ను మినహాయింపు పొందే వీలును సెక్షన్ 80డి అందిస్తోంది.

వివరాలు

చివరిసారిగా ఎప్పుడు సవరించారు?

సెక్షన్ 80డి చివరి సవరణ 2015 బడ్జెట్‌లో జరిగింది. అప్పట్లో ₹15,000 పరిమితిని ₹25,000కు పెంచారు. 2018లో సీనియర్ సిటిజన్ల మినహాయింపు పరిమితిని ₹30,000 నుండి ₹50,000కు పెంచారు. అప్పటి నుంచి ప్రతి బడ్జెట్‌కు ఈ పరిమితి పెరుగుతుందనే ఆశలు సాదారణ ప్రజల్లో ఉన్నాయి, కానీ ఇప్పటివరకు నిరాశే మిగిలింది.

వివరాలు

డిమాండ్‌ ఎందుకు?

దేశంలో వైద్య ఖర్చులు విపరీతంగా పెరుగుతున్నాయి. ముఖ్యంగా కోవిడ్ తర్వాత ఈ పరిస్థితి మరింత దిగజారింది. ప్రస్తుత పన్ను మినహాయింపు పరిమితులు ప్రజల అవసరాలను తీరించడంలో విఫలమవుతున్నాయని అభిప్రాయం వ్యక్తమవుతోంది. చిన్నపిల్లలు లేదా వయోవృద్ధులు ఉన్న కుటుంబాలు ఈ పరిమితి పెంపును అత్యవసరంగా కోరుతున్నాయి. పరిమితి పెంచడం ద్వారా బీమా కవరేజీ లేని కుటుంబాలను ఆరోగ్య బీమా పరిధిలోకి తీసుకురావచ్చు. కొత్త పన్ను విధానాన్ని ఆకర్షణీయంగా మార్చడానికి కూడా 80డి ప్రయోజనాలను అందించడం అవసరం. కోవిడ్ తరువాత ప్రజలు అప్రమత్తంగా ఉంటున్నారు. అందువల్ల, అందరికీ ఆరోగ్య బీమా అందుబాటులోకి రావడం ప్రభుత్వాల కర్తవ్యమని నిపుణులు స్పష్టం చేస్తున్నారు.