Allu Sirish: సోషల్ మీడియాలో పోలీసులకు అల్లు శిరీష్ ఫిర్యాదు.. అసలేం జరిగిందంటే?
ఈ వార్తాకథనం ఏంటి
హైదరాబాద్ నగరంలో రాత్రి వేళల్లో నిబంధనలకు విరుద్ధంగా మితిమీరిన శబ్దంతో మైకులు, లౌడ్ స్పీకర్లు మోగిస్తుండటంపై ప్రముఖ నటుడు అల్లు శిరీష్ (Allu Sirish) ఆందోళన వ్యక్తం చేశారు. అర్ధరాత్రి సమయాల్లోనూ ఆలయాల నుంచి వస్తున్న భారీ శబ్దాలతో స్థానిక ప్రజలు తీవ్ర ఇబ్బందులు ఎదుర్కొంటున్నారని ఆయన పేర్కొన్నారు. ముఖ్యంగా వృద్ధులు, చిన్నపిల్లలు, ఉద్యోగులు నిద్రకు దూరమవుతూ తీవ్ర అసౌకర్యానికి గురవుతున్నారని తెలిపారు. ఈ సమస్యపై ఆయన సోషల్ మీడియా వేదికగా హైదరాబాద్ సిటీ పోలీసులకు ఫిర్యాదు చేశారు. షేక్పేట్లోని 'అపర్ణ వన్' గేటెడ్ సొసైటీలో నివసిస్తున్న అల్లు శిరీష్.. తన ప్రాంతంలో ఎదురవుతున్న సమస్యను వివరిస్తూ 'ఎక్స్' వేదికగా హైదరాబాద్ సిటీ పోలీసులను ట్యాగ్ చేస్తూ పోస్ట్ చేశారు.
వివరాలు
అర్ధరాత్రి 3 గంటల వరకు మైకుల శబ్దం
తన సొసైటీ సమీపంలోని వినోభానగర్ హనుమాన్ ఆలయం నుంచి గత కొద్ది రోజులుగా అనుమతించిన డెసిబుల్స్ పరిమితికి మించి భారీ శబ్దంతో లౌడ్ స్పీకర్లలో మ్యూజిక్ ప్లే చేస్తున్నారని ఆయన వెల్లడించారు.
అంతేకాకుండా అర్ధరాత్రి 2 గంటల నుంచి 3 గంటల వరకు కూడా మైకుల శబ్దం కొనసాగుతోందని అల్లు శిరీష్ తన పోస్టులో పేర్కొన్నారు.
ఈ కారణంగా రాత్రి వేళల్లో ప్రజలు ప్రశాంతంగా నిద్రపోలేకపోతున్నారని ఆవేదన వ్యక్తం చేశారు.
ఈ సమస్యపై గతంలోనే ఫిలింనగర్ పోలీస్ స్టేషన్లో ఫిర్యాదు చేసినట్లు శిరీష్ వెల్లడించారు. అయితే వినాయక నిమజ్జనం పూర్తయ్యే వరకు కొంత సర్దుకుపోవాలని పోలీసులు తమకు సూచించినట్లు తెలిపారు.
వివరాలు
ప్రజలకు ఇబ్బందులు కలగకుండా చూడాలి
సెప్టెంబర్ 25తో గణేష్ నిమజ్జనం పూర్తయినప్పటికీ.. పండుగ ముగిసిన తర్వాత కూడా సదరు ఆలయంలో మైకుల శబ్దం మాత్రం తగ్గలేదని ఆయన పేర్కొన్నారు.
దీంతో తమ 'అపర్ణ వన్' సొసైటీలోని వృద్ధులు, పసిపిల్లలు, వర్కింగ్ ప్రొఫెషనల్స్ తీవ్ర ఇబ్బందులు పడుతున్నారని అల్లు శిరీష్ తెలిపారు. నిద్రలేక తీవ్ర అసౌకర్యానికి గురవుతున్నారని చెప్పారు.
ఈ విషయంపై స్థానికులు గతంలో ఎన్నోసర్లు ఫిర్యాదులు చేసినప్పటికీ ఎలాంటి చర్యలు తీసుకోలేదని ఆయన ఆరోపించారు.
ఇప్పటికైనా పోలీసులు ఈ సమస్యను సీరియస్గా పరిగణించి తగిన చర్యలు తీసుకోవాలని అల్లు శిరీష్ హైదరాబాద్ సిటీ పోలీసులను కోరారు.
ప్రజలకు ఇబ్బంది కలిగించేలా అర్ధరాత్రి వరకు మైకులు మోగించకుండా సమస్యను పరిష్కరించాలని విజ్ఞప్తి చేశారు.
వివరాలు
స్పందిస్తున్న నెటిజన్లు
సాధారణంగా రాత్రి 10 గంటల తర్వాత లౌడ్ స్పీకర్లు, డీజేలను నిషేధిస్తూ నిబంధనలు ఉన్నప్పటికీ.. అర్ధరాత్రి 3 గంటల వరకు మితిమీరిన డెసిబుల్స్తో మైకులు మోగిస్తుండటంపై స్థానికులు కూడా తీవ్ర అసహనం వ్యక్తం చేస్తున్నారు.
రాత్రి వేళల్లో శబ్ద కాలుష్యం కారణంగా వృద్ధులు, చిన్నపిల్లలు, ఉద్యోగులు ఇబ్బందులు పడుతున్నారని చెబుతున్నారు.
సెలబ్రిటీ అయిన అల్లు శిరీష్ స్వయంగా ఈ సమస్యను సోషల్ మీడియా వేదికగా వెలుగులోకి తీసుకురావడంతో నెటిజన్లు కూడా స్పందిస్తున్నారు.
హైదరాబాద్ నగరంలోని పలు ప్రాంతాల్లో రాత్రి వేళల్లో శబ్ద కాలుష్యంపై పోలీసులు గట్టి నిఘా ఉంచాలని పలువురు సూచిస్తున్నారు. నిబంధనలు ఉల్లంఘించే వారిపై కఠిన చర్యలు తీసుకోవాలని కామెంట్లు చేస్తున్నారు.