అమితాబ్ బచ్చన్ బర్త్ డే: అర్థరాత్రి అమితాబ్ ఇంటికి వచ్చి విషెస్ తెలియజేసిన అభిమానులు
బాలీవుడ్ మెగాస్టార్ అమితాబ్ బచ్చన్ ఈరోజున(అక్టోబర్ 11) తన 81వ పుట్టినరోజును జరుపుకుంటున్నారు. ఈ నేపథ్యంలో ముంబై నగరంలోని జుహూ ప్రాంతంలో ఉన్న అమితాబ్ ఇంటికి అభిమానులు తరలి వచ్చారు. అమితాబ్ బచ్చన్ కి పుట్టినరోజు శుభాకాంక్షలు తెలియజేయడానికి అర్థరాత్రి 12గంటల సమయంలో అమితాబ్ ఇంటి ముందు గుమిగూడారు. అమితాబ్ బచ్చన్ పై తమ అభిమానాన్ని వివిధ రకాలుగా ప్రదర్శించారు. కొంతమంది అభిమానులు అమితాబ్ బచ్చన్ ఫోటో ఉన్న టీ షర్టును ధరించారు. మరికొంత మంది అమితాబ్ బచ్చన్ సినిమా టైటిల్స్ తో ఉన్న టీ షర్టులను ధరించారు. అంతేకాదు, అమితాబ్ బచ్చన్ పాటలకు డ్యాన్సులు కూడా చేసారు.
అభిమానులను కలిసిన అమితాబ్ బచ్చన్
తన పుట్టినరోజు నాడు అభిమానులంతా కలిసి ఇంటికి రావడంతో అమితాబ్ బచ్చన్ వాళ్ళందరినీ కలవడానికి బయటకు వచ్చారు. రాత్రి 12:10గంటల ప్రాంతంలో అభిమానులను కలవడానికి అమితాబ్ బచ్చన్ బయటకు వచ్చారు. అభిమానులకు అభివాదం చేసారు. ప్రస్తుతం ఆ ఫోటోలు ఇంటర్నెట్ లో వైరల్ అవుతున్నాయి. సాధారణంగా అమితాబ్ బచ్చన్, తన అభిమానులను ఇంటివద్ద రెగ్యులర్ గా కలుస్తూ ఉంటారు. అదలా ఉంచితే, 81ఏళ్ళ వయసులోనూ అమితాబ్ బచ్చన్ సినిమాల్లో నటిస్తున్నారు. హిందీలో ఆయన నటించిన గణపత్ సినిమా మరికొద్ది రోజుల్లో విడుదల కానుంది. తెలుగులో ప్రభాస్ హీరోగా రూపొందుతున్న కల్కి 2898 AD సినిమాలో అమితాబ్ నటిస్తున్నారు.
