Anurag Kashyap: CBFC స్క్రీనింగ్‌కు హిందీ డిక్షనరీ తీసుకెళ్లా: బోర్డు తీరుపై దర్శకుడు ఆగ్రహం
ఈ వార్తాకథనం ఏంటి
బాలీవుడ్ దర్శకుడు అనురాగ్ కశ్యప్ సెన్సార్ బోర్డు చర్యలపై తీవ్ర అసంతృప్తి వ్యక్తం చేశారు. అనుపమ పరమేశ్వరన్, సురేశ్ గోపి ప్రధాన పాత్రల్లో నటించిన 'జానకి వర్సెస్ స్టేట్ ఆఫ్ కేరళ' చిత్రానికి సంబంధించి సెన్సార్ బోర్డు తీరుపై విమర్శలు గుప్పించారు. పురాణాలలో కనిపించే వ్యక్తుల పేర్లను సినిమాల్లో ఉపయోగించకూడదని ఎలా చెప్పగలుగుతారని ప్రశ్నించారు. సెన్సార్ బోర్డు అభ్యంతరాలను ప్రస్తావిస్తూ.. ఇలా అయితే సినిమాలు ఎలా తీయగలమని ప్రశ్నించారు.
వివరాలు
సినిమా అనేది మోరల్ లెస్సన్ చెప్పేందుకు రూపొందించేది కాదు
''కథలు రాసేటప్పుడు పాత్రలకు పురాణాలలో ఉన్న పేర్లు పెట్టవద్దని చెప్పడం నిజంగా ఆశ్చర్యంగా ఉంది. ఇది ఆలోచించాల్సిన విషయం. ఎందుకంటే, వారు వాస్తవిక ప్రపంచంలోని ప్రసిద్ధ వ్యక్తుల పేర్లను కూడా సినిమాల్లో వాడవద్దని చెబుతారు.పాత్రలను పూర్తిగా నెగెటివ్‌గా చూపించవద్దంటారు. ఇది చేయొద్దు, అది చేయొద్దు అని నిరంతరం ఆంక్షలు విధిస్తారు. మరి అలా అయితే మేము పాత్రలకు XYZ, 123, ABC అనే పేర్లు పెట్టాలా?'' అని ప్రశ్నించారు. సినిమా అనేది మోరల్ లెస్సన్ చెప్పేందుకు రూపొందించేదికాదని ఆయన స్పష్టం చేశారు. కానీ సినిమాలు సమాజంలో మార్పు తేవాలనే ఆశయంతో తీసినా, వాస్తవానికి అంత ప్రభావం చూపడం లేదని పేర్కొన్నారు. అయినా కూడా నమ్మిన కథను నిజాయితీగా చెప్పడం ఎంతో అవసరమని చెప్పారు.
వివరాలు
సమస్యను వివరించేందుకు సినిమా ప్రదర్శించినప్పుడు హిందీ డిక్షనరీ తీసుకెళ్లా
అనంతరం ఆయన, అనురాగ్ కశ్యప్ సెన్సార్ బోర్డులో ఉన్న భాషా సంబంధిత లోపాల గురించి మాట్లాడారు. గతంలో తనకు ఎదురైన ఒక అనుభవాన్ని వివరించారు.''నా తొలి సినిమా సెన్సార్‌కు పంపినప్పుడు, అందులోని ఒక పదాన్ని పట్టుకుని వారు అభ్యంతరం వ్యక్తం చేశారు. నిజంగా చెప్పాలంటే, సెన్సార్ బోర్డు మహారాష్ట్రలో ఉన్నా కూడా అక్కడ ఉన్న సభ్యులకు హిందీ భాష సరైన రీతిలో తెలియదు. దాంతో వారు ఆ పదానికి తాము అర్థం చేసుకున్న విధంగా వక్రీకరించి భావించారు. సమస్యను వివరించేందుకు సినిమా ప్రదర్శించినప్పుడు హిందీ డిక్షనరీ తీసుకెళ్లాల్సి వచ్చింది. అప్పట్లో వారు డిక్షనరీలు తీసుకెళ్లడానికి అనుమతి ఇచ్చారు. కానీ ఇప్పుడు మొబైల్ ఫోన్ కూడా లోపలికి తీసుకెళ్లనివ్వడం లేదు,'' అని అనురాగ్ వెల్లడించారు.
వివరాలు
జానకి పాత్రలో అనుపమ పరమేశ్వరన్
'జానకి వర్సెస్ స్టేట్ ఆఫ్ కేరళ' సినిమాను ప్రవీణ్ నారాయణన్ తెరకెక్కించారు. థ్రిల్లర్ నేపథ్యంలో రూపుదిద్దుకున్న ఈ సినిమాకు 'సత్యం ఎప్పటికైనా గెలుస్తుంది' అనే ఉప శీర్షికను పెట్టారు. ఈ చిత్రంలో అనుపమ పరమేశ్వరన్ జానకి పాత్రలో నటిస్తున్నారు. కోర్ట్ రూమ్ డ్రామాగా తెరకెక్కిన ఈ చిత్రంపై సెన్సార్ బోర్డు అభ్యంతరం వ్యక్తం చేసింది. సీతాదేవికి మరో పేరు జానకి కావడం, అదే పేరును లైంగిక దాడికి గురైన మహిళ పాత్రకు ఉపయోగించడం సరిగ్గా లేదని అభిప్రాయపడింది. చిత్ర బృందానికి సినిమా టైటిల్‌ను మార్చాలని సూచించింది. ఈ కారణంగా సినిమా విడుదల ఆలస్యమైంది.