బ్రో ట్విట్టర్ రివ్యూ: మామా అల్లుళ్ళు హిట్టు కొట్టారా?
పవర్ స్టార్ పవన్ కళ్యాణ్, సాయి ధరమ్ తేజ్ కలిసి నటించిన బ్రో సినిమా, ఈరోజు థియేటర్లలో విడుదలైంది. ఈ నేపథ్యంలో బ్రో సినిమా చూసినవాళ్ళు ట్విట్టర్ లో తమ అభిప్రాయాలను పంచుకుంటున్నారు. ఇంతకీ బ్రో సినిమా ఎలా ఉందంటున్నారో ఇక్కడ చూద్దాం. ఫస్టాఫ్ మొత్తం హాయిగా నవ్వుల్ని పంచుతుందని కొంతమంది కామెంట్స్ చేస్తున్నారు. త్రివిక్రమ్ మార్క్ డైలాగ్స్ బాగున్నాయని చెబుతున్నారు. ఇంకా ఫస్టాఫ్ మొత్తం చాలా వేగంగా పరుగెడుతుందని తెలియజేస్తున్నారు. కథలో చాలా లోతు ఉందనీ, రేపటి కోసం ఆలోచిస్తూ ఈరోజును పట్టించుకోని మనిషి గురించి బాగా చెప్పారని కాంప్లిమెంట్స్ ఇస్తున్నారు. పవన్ కళ్యాణ్ ఎంట్రీ సీన్ అదిరిపోయిందనీ, అభిమానులను అలరించే సీన్స్ చాలా ఉన్నాయని అంటున్నారు.
వీఎఫ్ఎక్స్ క్వాలిటీ సరిపోలేదంటున్న నెటిజన్లు
సినిమాలోని మైనస్ పాయింట్ల గురించి కొందరు నెటిజన్లు కామెంట్లు చేస్తూ, వీఎఫ్ఎక్స్ క్వాలిటీ సాధారణంగా ఉందని, అలాగే పాటలు కూడా అంతగా ప్రభావం చూపలేదని కామెంట్స్ చేస్తున్నారు. థమన్ అందించిన నేపథ్య సంగీతం సినిమా కథకు సరిపోయే విధంగా అద్భుతంగా ఉందని తమ అభిప్రాయాలను పంచుకుంటున్నారు. మొత్తానికి కథలో మంచి డెప్త్ ఉందనీ, ఈ తరం వారు ఖచ్చితంగా చూడాల్సిన సినిమా అనీ నెటిజన్లు తెలియజేస్తున్నారు. కేతికా శర్మ, ప్రియా ప్రకాష్ వారియర్ హీరోయిన్లుగా కనిపించిన ఈ చిత్రంలో ఊర్వశి రౌతేలా ప్రత్యేక గీతంలో నర్తించింది. ఈ సినిమాను పి సముద్రఖని డైరెక్ట్ చేసారు. కథనం, మాటలను త్రివిక్రమ్ అందించారు.
