డెవిల్ గ్లింప్స్: భారతదేశ స్వాతంత్ర్యానికి ముందు జరిగే కథలో గూఢచారిగా కళ్యాణ్ రామ్
బింబిసార తర్వాత అమిగోస్ అనే సినిమాతో ప్రేక్షకుల ముందుకు వచ్చిన కళ్యాణ్ రామ్, పరాజయాన్ని ఎదుర్కొన్నాడు. ప్రస్తుతం డెవిల్ అనే సినిమాతో వస్తున్నాడు. తాజాగా డెవిల్ సినిమా గ్లింప్స్ విడుదలైంది. భారతదేశానికి స్వాతంత్రం రాకముందు జరిగిన కథను డెవిల్ సినిమాలో చూపించబోతున్నారని గ్లింప్స్ లో తెలియజేసారు. డెవిల్ అనే పేరుగల బ్రిటీషు వారి సీక్రెట్ ఏజెంట్ కథని చెప్పబోతున్నామని వీడియోలో చూపించారు. పంచె కట్టులో కనిపించిన కళ్యాణ్ రామ్ లుక్ అదిరిపోయింది. మనసులో ఉన్న భావన ముఖంలో తెలియకూడదు, మెదడులో ఉన్న ఆలోచన మాటల్లో బయటపడకూడదు, అదే గూఢచారికి ఉండాల్సిన ముఖ్యమైన లక్షణం అంటూ కళ్యాణ్ రామ్ చెప్పే డైలాగ్, గ్లింప్స్ వీడియోలో హైలైట్ గా నిలిచింది.
అందంగా మెరిసిన సంయుక్తా మీనన్
గ్లింప్స్ వీడియోలో కనిపించిన విజువల్స్ అన్నీ బాగున్నాయి. సంయుక్తా మీనన్ తళుక్కున మెరిసి మాయమైపోతుంది. చూస్తుంటే మంచి థ్రిల్లింగ్ ఎంటర్ టైన్మెంట్ ని డెవిల్ అందించనుందని అర్థమవుతుంది. అభిషేక్ పిక్చర్స్ బ్యానర్ లో రూపొందుతున్న ఈ చిత్రాన్ని నవీన్ మేడారం దర్శకత్వం వహించారు. కథ, కథనం, మాటలు శ్రీకాంత్ విస్సా అందించారు. హర్షవర్ధన్ రామేశ్వర్ మ్యూజిక్ అందిస్తున్న ఈ సినిమాకు ఎడిటింగ్ బాధ్యతలను తమ్మిరాజు నిర్వహిస్తున్నారు. ప్రస్తుతం షూటింగ్ జరుపుకుంటున్న ఈ చిత్రాన్ని ఎప్పుడు రిలీజ్ చేయనున్నారో మేకర్స్ ఇంకా వెల్లడి చేయలేదు.
