Mahesh Babu: 'దేవకీ నందన వాసుదేవ'లో స్పెష‌ల్ క్యారెక్టర్ చేస్తున్న మహేశ్ బాబు.?
'హీరో' చిత్రంతో తెలుగు ప్రేక్షకులకు పరిచయమయ్యాడు అశోక్ గల్లా. ప్రస్తుతం ఆయన కథానాయకుడిగా నటిస్తున్న కొత్త సినిమా 'దేవకీ నందన వాసుదేవ' (Devaki Nandana Vasudeva). 'హను-మాన్' ఫేమ్ ప్రశాంత్ వర్మ ఈ సినిమాకు కథ అందించారు. నవంబర్ 14న ఈ చిత్రం విడుదల కాబోతోంది. ఈ సందర్భంగా, సినిమా గురించి ఒక ఆసక్తికరమైన విషయం నెట్టింట వైరల్ అవుతోంది. ఈ చిత్రంలో మహేష్ బాబు అతిథి పాత్రలో కనిపించబోతున్నారని వార్తలు వస్తున్నాయి. క్లైమాక్స్‌లో శ్రీ కృష్ణుడి పాత్రకు సంబంధించిన కొన్ని ముఖ్యమైన సన్నివేశాలు ఉంటాయని, అందులో మహేశ్ నటిస్తే ఎంతో అద్భుతంగా ఉంటుంది అని చిత్ర బృందం భావిస్తున్నట్లు తెలుస్తోంది.
ఆధ్యాత్మిక అంశాలతో కూడిన ఫ్యామిలీ యాక్షన్ ఎంటర్‌టైనర్‌గా సినిమా
ఈ విషయమై మహేశ్‌ను ఒప్పించి షూట్ చేసినట్లు సమాచారం అందుతోంది. క్లైమాక్స్‌లో మహేశ్ కృష్ణుడి అవతారంలో దర్శనమివ్వనున్నాడని ప్రచారం జరుగుతోంది. కానీ, ఈ విషయంలో ఎలాంటి అధికారిక ప్రకటన ఇప్పటివరకు వెలువడలేదు. అర్జున్ జంధ్యాల దర్శకత్వంలో రూపొందుతున్న 'దేవకీ నందన వాసుదేవ' చిత్రం, మానస వారణాసి కథానాయికగా కనిపించనుంది. యాక్షన్ ఎంటర్‌టైనర్‌గా రూపొందుతున్న ఈ చిత్రాన్ని సోమినేని బాలకృష్ణ నిర్మిస్తున్నారు. ''ఆధ్యాత్మిక అంశాలతో కూడిన ఫ్యామిలీ యాక్షన్ ఎంటర్‌టైనర్‌గా ఇది రూపొందుతోంది. ఇందులో అశోక్ మాస్ యాక్షన్ పాత్రలో కనిపిస్తారని చిత్ర వర్గాలు తెలిపాయి'' అని సమాచారం. మహేశ్ బాబు ప్రస్తుతం రాజమౌళి దర్శకత్వంలో ఒక సినిమాకు సన్నద్ధమవుతున్నారు, ఈ సినిమా షూటింగ్ జనవరి నుంచి ప్రారంభమవ్వనుంది.
