Mohanlals Daughter Vismaya: 'స్కూల్లో మా నాన్న హీరో అని ఎవరికీ తెలియదు'.. ఆసక్తికర విషయాలు చెప్పిన విస్మయా మోహన్లాల్
ఈ వార్తాకథనం ఏంటి
మలయాళ సినీ దిగ్గజం మోహన్లాల్ కుమార్తె విస్మయా మోహన్లాల్ ఇప్పుడు నటిగా వెండితెరకు పరిచయం అవుతున్నారు. ఆమె ప్రధాన పాత్రలో నటించిన 'తుడక్కం' సినిమా ఆగస్టు 7న ప్రేక్షకుల ముందుకు రానుంది. ఈ సందర్భంగా తన చిన్ననాటి జ్ఞాపకాలు, నటిగా మారిన ప్రయాణం, కుటుంబం ఇచ్చిన ప్రోత్సాహం గురించి విస్మయ పలు ఆసక్తికర విషయాలను పంచుకున్నారు.
వివరాలు
స్కూల్లో నాన్న హీరో అని ఎవరికీ తెలియదు
ఊటీలోని స్కూల్లో చదువుకునే సమయంలో తన తండ్రి మోహన్లాల్ ప్రముఖ సినీ హీరో అనే విషయం తన స్నేహితులకు తెలియదని విస్మయ చెప్పారు.
అయితే టీచర్లు మాత్రం తరచూ ఆయన గురించి అడిగేవారని పేర్కొన్నారు. ఒకసారి టీవీలో మోహన్లాల్ సినిమా వస్తుండగా, తెరపై ఆయనను చూసిన స్నేహితులు ఆశ్చర్యపోయారని చెప్పారు.
అందరూ తనవైపు చూస్తుండటంతో ఇబ్బందిగా అనిపించి వెంటనే ఛానల్ మార్చేయాలని చెప్పినట్లు గుర్తుచేసుకున్నారు.
చిన్నప్పటి నుంచే కళలంటే ఇష్టం
తనకు చిన్నప్పటి నుంచే మ్యాథ్స్, సైన్స్ కంటే డ్రాయింగ్, పెయింటింగ్, కవిత్వం వంటి సృజనాత్మక రంగాలపై ఎక్కువ ఆసక్తి ఉండేదని విస్మయ వెల్లడించారు.
కొన్నేళ్లుగా తాను రాసిన కవితలను 'గ్రెయిన్స్ ఆఫ్ స్టార్డస్ట్' పేరుతో పుస్తకంగా కూడా ప్రచురించినట్లు తెలిపారు.
వివరాలు
థియేటర్తో మొదలైన నటనా ప్రయాణం
కాలేజ్ పూర్తయ్యాక అమెరికా, యూకేలో థియేటర్ ఆర్ట్స్ అభ్యసించిన విస్మయ, మొదట రంగస్థల నాటకాలతో తన నటనా ప్రయాణాన్ని ప్రారంభించారు.
మొదట్లో స్టేజ్పైకి వెళ్లాలంటే చాలా భయపడేదాన్నని, కానీ వేదికపై నటిస్తున్నప్పుడు మాటల్లో చెప్పలేని ఆనందాన్ని అనుభవించేదాన్నని చెప్పారు.
"దీనికోసమే పుట్టానేమో అనిపించేది" అంటూ తన అనుభూతిని వివరించారు.
వివరాలు
తనపై తనకే సందేహాలు
సినిమాల్లో నటించాలని ఎప్పటి నుంచో అనిపించేదని, కానీ తన శరీరాకృతి, మలయాళ భాష మాట్లాడే విధానంపై తనకే నమ్మకం ఉండేది కాదని విస్మయ తెలిపారు.
మాతృభాష మలయాళమే అయినప్పటికీ, ఇంగ్లిష్ మీడియంలో చదువుకోవడం వల్ల మలయాళాన్ని అంత ధారాళంగా మాట్లాడలేకపోయేదాన్నని చెప్పారు.
'తుడక్కం'తో నటిగా తొలి అడుగు
కొంత ఆలస్యమైనా తల్లిదండ్రుల ప్రోత్సాహంతో 'తుడక్కం' సినిమాతో నటిగా పరిచయం అవుతున్నానని విస్మయ తెలిపారు.
తండ్రీ-కుమార్తెల మధ్య ఉన్న అనుబంధం చుట్టూ తిరిగే ఈ కథ తనకు ఎంతో నచ్చిందని చెప్పారు.
షూటింగ్కు ముందు రోజు టెన్షన్తో నిద్రపట్టలేదని, అయితే దర్శకుడు జూడ్ ఆంటోనీ జోసెఫ్ ఎంతో ధైర్యం చెప్పి తనలోని భయాన్ని తొలగించారని వెల్లడించారు.
వివరాలు
అన్న, నాన్న ఇచ్చిన సలహాలు
నటన విషయంలో తన అన్న, నటుడు ప్రణవ్ మోహన్లాల్ సలహా అడిగితే మరీ ఎక్కువగా ఆలోచించకు... వెళ్లి సరదాగా ఎంజాయ్ చెయ్ అని చెప్పాడని విస్మయ తెలిపారు. అలాగే తండ్రి మోహన్లాల్... ఇది నీ జీవితం... దాన్ని నువ్వే మలచుకోవాలని ప్రోత్సహించినట్లు చెప్పారు.
పాత్ర కోసం నెల రోజుల ప్రిపరేషన్
'తుడక్కం' స్క్రిప్ట్ను నెల రోజుల ముందే తీసుకుని పూర్తిగా చదివి, డైలాగులను గుర్తుంచుకునేందుకు బాగా సాధన చేశానని విస్మయ తెలిపారు.
షూటింగ్ ప్రారంభమైన తర్వాత తనపై తనకు నమ్మకం పెరిగిందని చెప్పారు. ఈ సినిమాలో తన స్నేహితురాలి పాత్ర చేసిన అమ్మాయే తన పాత్రకు డబ్బింగ్ చెప్పిందని వెల్లడించారు.
వివరాలు
హిమాలయాలంటే ప్రత్యేకమైన ఇష్టం
ఒకే చోట ఎక్కువ రోజులు ఉండటం తనకు బోర్ కొడుతుందని, అందుకే ఒంటరిగా ట్రావెలింగ్ చేయడం ఇష్టమని చెప్పారు.
అప్పుడప్పుడు అన్న ప్రణవ్తో కలిసి టూర్లకు వెళ్తుంటానని, హిమాలయ పర్వతాలే తమకు అత్యంత ఇష్టమైన డెస్టినేషన్ అని వెల్లడించారు.
జీవితంలో కొత్త అనుభవాలను సొంతం చేసుకోవాలన్నదే తన సిద్ధాంతమని చెప్పారు.
వివరాలు
100 కిలోల నుంచి ఫిట్నెస్ జర్నీ
ఒకప్పుడు తన బరువు 100 కిలోలు ఉండేదని, మెట్లు ఎక్కాలన్నా ఆయాసం వచ్చేదని విస్మయ గుర్తుచేసుకున్నారు.
థాయ్లాండ్ ట్రిప్కు వెళ్లిన సమయంలో ముయ్ థాయ్ మార్షల్ ఆర్ట్స్ శిక్షణ కేంద్రంలో చేరానని తెలిపారు.
రెండు వారాల కోసం వెళ్లిన తాను, కోవిడ్ లాక్డౌన్ కారణంగా ఎనిమిది నెలలు అక్కడే ఉండాల్సి వచ్చిందని చెప్పారు.
ఆ సమయంలో ముయ్ థాయ్లో శిక్షణ తీసుకోవడంతో పాటు 22 కిలోల బరువు తగ్గి ఫిట్నెస్ సాధించానని వెల్లడించారు.
వివరాలు
అమ్మ నుంచి దర్శకుడికి ప్రత్యేక బహుమతి
'తుడక్కం' సినిమా, అందులో తన నటన తన తల్లికి ఎంతో నచ్చిందని విస్మయ తెలిపారు. ఆ ఆనందంలో దర్శకుడు జూడ్ ఆంటోనీ జోసెఫ్కు ఆమె రిస్ట్ వాచ్ను బహుమతిగా ఇచ్చారని చెప్పారు.
ప్రేక్షకులు కూడా తన నటనను ఆదరిస్తారని ఆశిస్తున్నానని, ఇకపై కూడా తన అభిరుచికి తగ్గ విభిన్నమైన పాత్రలను ఎంపిక చేసుకోవడమే తన లక్ష్యమని విస్మయ మోహన్లాల్ పేర్కొన్నారు.