Trisha : త్రిష కేసులో ట్విస్ట్..ఖుష్భూ,చిరంజీవిపై పరువు నష్టం దావా వేయనున్న అలీఖాన్
కోలీవుడ్ నటుడు మన్సూర్ అలీ ఖాన్ మరో కొత్త అంశాన్ని తెరలేపారు. ఇటీవలే హీరోయిన్ త్రిషకు క్షమాపణ చెప్పిన అలీఖాన్, తాజాగా సంచలన వ్యాఖ్యలు చేశారు. చిరంజీవి, ఖుష్బూ మీద పరువు నష్టం దావా వేస్తున్నట్లు చెప్పారు. 'లియో' దర్శకుడు లోకేష్ కనగరాజ్, చిరంజీవి, నితిన్, ఖుష్బూ సహా హీరోయిన్లు మాళవికా మోహనన్ తదితరులు సోషల్ మీడియాలో త్రిషకు మద్దతిస్తూ పోస్టులు చేశారు. వివాదం కాస్త ముదరడంతో మన్సూర్ అలీఖాన్ త్రిషకు క్షమాపణలు చెప్పారు. అనంతరం స్పందించిన త్రిష, తప్పు చేయడం మానవత్వం, క్షమించడం దైవత్వం అని అన్నారు. దీంతో వివాదానికి తెరపడినట్లు అంతా భావించారు. కానీ ఈ సమయంలోనే మన్సూర్ అలీ ఖాన్ మరో సంచలన వివాదానికి తెర తీశారు.
10 రోజుల పాటు ప్రజా శాంతికి ఇబ్బందులు కలిగించారు : మన్సూర్ అలీఖాన్
త్రిష సహా మెగాస్టార్ చిరంజీవి, ఖుష్బూ మీద కేసు నమోదు చేస్తానని మన్సూర్ అలీ ఖాన్ స్పష్టం చేశారు. ఈ మేరకు తన లాయర్ గురు ధనుంజయ్ ద్వారా చెన్నై కోర్టులో సోమవారం పరువు నష్టం దావా వేయనున్నట్లు ఓ లేఖ విడుదల చేశారు. 10 రోజుల పాటు ప్రజా శాంతికి ఇబ్బందులు సృష్టించారని, అల్లర్లు సృష్టించాలని కుట్రలు చేశారని ఆరోపిస్తూ కేసు ఫైల్ చేస్తామన్నారు. ఈ క్రమంలోనే సివిల్ సహా క్రిమినల్ దావా వేస్తామన్నారు. విలేకరుల సమావేశంలో తాను మాట్లాడిన మాటలను వారం తర్వాత ఎడిట్ చేశారని, త్రిష గురించి తప్పుగా మాట్లాడినట్లు చిత్రీకరించారన్నారు. పూర్తి ఆధారాలతో కేసు వేయనున్నట్లు మన్సూర్ అలీ ఖాన్ అన్నారు.
