Delhi: 10 లక్షల మంది.. 20 వేల వాహనాలు.. ఢిల్లీ వ్యాపారుల్లో ర్యాలీ టెన్షన్‌!
ఈ వార్తాకథనం ఏంటి
దేశ రాజధాని దిల్లీలో నవంబర్‌ 1న ఇండియా కూటమి నిర్వహించనున్న భారీ నిరసన ర్యాలీపై వ్యాపారులు ఆందోళన వ్యక్తం చేస్తున్నారు. దీపావళికి ముందు కీలకమైన వ్యాపార సీజన్‌లో ఈ కార్యక్రమం నిర్వహిస్తే తమ వ్యాపారాలు తీవ్రంగా దెబ్బతింటాయని చెబుతున్నారు. అందువల్ల ర్యాలీని వాయిదా వేయాలని మరోసారి కోరారు. ఈ మేరకు ఛాంబర్‌ ఆఫ్‌ ట్రేడ్‌ అండ్‌ ఇండస్ట్రీ (సీటీఐ) ఛైర్మన్‌ బ్రిజేష్‌ గోయల్‌.. కాంగ్రెస్‌ అగ్రనేత రాహుల్‌ గాంధీకి లేఖ రాశారు. ఆ లేఖ ప్రతిని కాంగ్రెస్‌ అధ్యక్షుడు మల్లికార్జున ఖర్గేకు కూడా పంపించారు. ఈ విషయంపై ఇండియా కూటమి భాగస్వామ్య పక్షాలతో చర్చించాలని విజ్ఞప్తి చేశారు.
వివరాలు
10 లక్షల మంది హాజరవుతారని అంచనా
నవంబర్‌ 1న ఢిల్లీలోని రామ్‌లీలా మైదాన్‌లో జరగనున్న ఈ ర్యాలీకి సుమారు 10 లక్షల మంది హాజరవుతారని అంచనా వేస్తున్నారు.
ప్రస్తుతం దీపావళి షాపింగ్‌ జోరుగా సాగుతున్న నేపథ్యంలో భారీ ర్యాలీ నిర్వహిస్తే మార్కెట్లకు వచ్చే వినియోగదారుల సంఖ్య తగ్గుతుందని వ్యాపారులు ఆందోళన చెందుతున్నారు.
వ్యాపారాలు దెబ్బతినకుండా ఉండేందుకు కార్యక్రమాన్ని దీపావళి తర్వాత నిర్వహించాలని కోరుతున్నారు.
గతంలో తాము చేసిన విజ్ఞప్తిని రాహుల్‌ గాంధీ తిరస్కరించడంపై బ్రిజేష్‌ గోయల్‌ అసంతృప్తి వ్యక్తం చేశారు.
సోమవారం రాహుల్‌ గాంధీ సామాజిక మాధ్యమం ఎక్స్‌లో చేసిన పోస్టును ఈ సందర్భంగా ప్రస్తావించారు.
ప్రధానమంత్రి నరేంద్ర మోదీ.. ప్రధాన ఎన్నికల కమిషనర్‌ జ్ఞానేశ్‌ కుమార్‌ను పదవి నుంచి తొలగిస్తే 30 సెకన్లలో నిరసనలను నిలిపివేయవచ్చని రాహుల్‌ పేర్కొన్నారు.
వివరాలు
10 లక్షల మంది హాజరవుతారని అంచనా
'ఢిల్లీ వ్యాపారులారా.. మేము మిమ్మల్ని ప్రేమిస్తున్నాం. మీ సమస్యలను వింటున్నాం. ప్రభుత్వం మెట్రోను మూసివేసి, రహదారులను దిగ్బంధించి, రాజధానిని నిర్బంధంలో ఉంచింది. ఓట్ల చోరీ జరిగితే మీ దుకాణం, మీ పొదుపు, మీ పిల్లల భవిష్యత్తు.. ఏదీ సురక్షితంగా ఉండదు' అని రాహుల్‌ తన పోస్టులో పేర్కొన్నారు.
ఓట్ల చోరీ ఆరోపణలు ఎదుర్కొంటున్న నాలుగో నిందితుడిగా జ్ఞానేశ్‌ కుమార్‌ను అభివర్ణించారు. ఆయనను పదవి నుంచి తొలగించాలని ప్రధాని మోదీని కోరారు.
ట్విట్టర్ పోస్ట్ చేయండి
రాహుల్‌ చేసిన ట్వీట్
To every trader in Delhi: We love you and hear you.
— Rahul Gandhi (@RahulGandhi) October 26, 2026
The Govt shut the metro, sealed our roads and locked down our capital.
With a stolen vote nothing is safe - your shop, your savings, your children’s future.
Tell Modi to sack accused no. 4, Gyanesh Kumar and the protests will… pic.twitter.com/USuHyO7qVW
వివరాలు
20 ప్రధాన మార్కెట్లపై ప్రభావం
ర్యాలీ కారణంగా రామ్‌లీలా మైదాన్‌ పరిసరాల్లోని 20 ప్రధాన మార్కెట్ల వ్యాపారాలు తీవ్రంగా దెబ్బతినే ప్రమాదం ఉందని సీటీఐ ఆందోళన వ్యక్తం చేసింది.
అక్టోబర్‌ 31 నుంచే బారికేడ్లు ఏర్పాటు చేసి రహదారులను మూసివేస్తారా? నవంబర్‌ 1న వ్యాపారులు దుకాణాలు తెరిచేందుకు అనుమతి ఉంటుందా? వినియోగదారులు మార్కెట్లకు చేరుకోగలరా? అంటూ ప్రశ్నించింది.
ర్యాలీ నిర్వహణతో రవాణాకు అంతరాయం ఏర్పడితే పండుగ సీజన్‌లో వ్యాపారాలు నష్టపోతాయని తెలిపింది.
ర్యాలీకి సుమారు 10 లక్షల మందిని తరలించేందుకు 15 వేల నుంచి 20 వేల బస్సులు వచ్చే అవకాశం ఉందని సీటీఐ అంచనా వేసింది.
వీటితో పాటు రాజకీయ నాయకుల ప్రైవేటు వాహనాలు కూడా భారీ సంఖ్యలో రావచ్చని పేర్కొంది.
వివరాలు
రామ్‌లీలా మైదాన్‌ చుట్టుపక్కల అతిపెద్ద హోల్‌సేల్‌, రిటైల్‌ మార్కెట్లు
రామ్‌లీలా మైదాన్‌ చుట్టుపక్కల ఢిల్లీలోని అతిపెద్ద హోల్‌సేల్‌, రిటైల్‌ మార్కెట్లు ఉన్నాయని వివరించింది.
ఈ మార్కెట్లకు వెళ్లే ప్రధాన మార్గాలు ర్యాలీ జరిగే ప్రాంతం గుండా సాగుతాయని తెలిపింది.
చాందినీ చౌక్‌, భాగీరథ్‌ ప్యాలెస్‌, ఖారీ బావోలీ, సదర్‌ బజార్‌, చావ్రీ బజార్‌, కశ్మీరీ గేట్‌, నబీ కరీం, కరోల్‌ బాగ్‌ వంటి ప్రముఖ మార్కెట్లపై ర్యాలీ ప్రభావం పడుతుందని వ్యాపారులు ఆందోళన చెందుతున్నారు.
ఈ ప్రాంతాల్లో రాకపోకలు నిలిచిపోతే సరుకుల రవాణాతో పాటు కొనుగోళ్లు, అమ్మకాలు కూడా దెబ్బతింటాయని చెబుతున్నారు.
వివరాలు
రూ.10 వేల కోట్ల నష్టం వాటిల్లే ప్రమాదం
అక్టోబర్‌ 10న ఢిల్లీలోని జంతర్‌ మంతర్‌ వద్ద జరిగిన నిరసన కార్యక్రమానికి కేవలం 3 వేల నుంచి 4 వేల మంది మాత్రమే హాజరయ్యారని సీటీఐ గుర్తుచేసింది.
అయినప్పటికీ సెంట్రల్‌ ఢిల్లీ ప్రాంతమంతా రాకపోకలకు అంతరాయం ఏర్పడిందని పేర్కొంది.
ఆ నిరసన కారణంగా వ్యాపారులకు సుమారు రూ.3,000 కోట్ల నష్టం వాటిల్లిందని తెలిపింది.
అలాంటిది నవంబర్‌ 1న 10 లక్షల మందితో భారీ ర్యాలీ నిర్వహిస్తే పాత ఢిల్లీలో వ్యాపార కార్యకలాపాలు పూర్తిగా స్తంభించిపోయే ప్రమాదం ఉందని సీటీఐ హెచ్చరించింది.
ఈ కార్యక్రమం వల్ల రూ.10 వేల కోట్ల వరకు నష్టం సంభవించవచ్చని అంచనా వేసింది.
వివరాలు
రూ.10 వేల కోట్ల నష్టం వాటిల్లే ప్రమాదం
దీపావళికి ముందు వ్యాపారాలు ఊపందుకునే సమయంలో ఇలాంటి పరిస్థితి ఏర్పడితే వ్యాపారులు తీవ్రంగా నష్టపోతారని వివరించింది.
ర్యాలీని వాయిదా వేయడం సాధ్యం కాకపోతే రామ్‌లీలా మైదాన్‌కు బదులుగా బురారీ గ్రౌండ్స్‌ లేదా జవహర్‌లాల్‌ నెహ్రూ స్టేడియంలో నిర్వహించాలని సీటీఐ సూచించింది.
దీనివల్ల ప్రధాన మార్కెట్లలో రాకపోకలకు అంతరాయం తగ్గడంతో పాటు వ్యాపార కార్యకలాపాలు యథావిధిగా కొనసాగేందుకు అవకాశం ఉంటుందని పేర్కొంది.