Sanjay Gaikwad: రాహుల్ గాంధీ నాలుక కోసిన వారికి 11 లక్షలిస్తా.. శివసేన ఎమ్మెల్యే వివాదాస్పద వ్యాఖ్యలు
మహారాష్ట్ర సీఎం ఏక్‌నాథ్ షిండే వర్గానికి చెందిన శివసేన ఎమ్మెల్యే సంజయ్ గైక్వాడ్ సంచలన వ్యాఖ్యలు చేశారు. రాహుల్ గాంధీ నాలుకను కోసేవారికి రూ.11 లక్షలు ఇస్తానని కాంగ్రెస్ నేత రాహుల్ గాంధీపై తీవ్ర విమర్శలు చేశారు. రిజర్వేషన్లను రద్దు చేయాలని రాహుల్ గాంధీ అమెరికా పర్యటనలో చేసిన వ్యాఖ్యలపై గైక్వాడ్ ఫైర్ అయ్యారు. రాహుల్ గాంధీ రిజర్వేషన్లను వ్యతిరేకిస్తూ మాట్లాడడం తన అసలు మనస్తత్వాన్ని చూపించిందన్నారు.
రాజకీయ దుమారాన్ని రేపుతున్న గైక్వాడ్ వ్యాఖ్యలు
రిజర్వేషన్ కోసం పోరాడుతున్న మరాఠాలు, ధన్‌గర్లు, ఓబీసీ వర్గాలను రాహుల్ గాంధీ అవమానపరుస్తున్నారని గైక్వాడ్ అన్నారు. రాహుల్ గాంధీ గతంలో రాజ్యాంగం గురించి మాట్లాడేవారని, కానీ ఇప్పుడు ఆయన వ్యాఖ్యలు ప్రజలకే ద్రోహం చేస్తున్నాయని గైక్వాడ్ ఆరోపించారు. రాజ్యాంగాన్ని బీజేపీ మార్చుతుందని గతంలో రాహుల్ గాంధీ చేసిన ఆరోపణలు ఇప్పుడు పచ్చి అబద్ధాలుగా బయటపడుతున్నాయని అన్నారు. ప్రస్తుతం గైక్వాడ్ వ్యాఖ్యలు రాజకీయ దుమారాన్ని రేపాయి.
