NTR Statue: గుజరాత్ స్టాట్యూ ఆఫ్ యూనిటీ తరహాలో.. అమరావతిలో ఎత్తయిన ఎన్టీఆర్ విగ్రహం..
ఈ వార్తాకథనం ఏంటి
ఆంధ్రప్రదేశ్‌లో మాజీ ముఖ్యమంత్రి, తెలుగుదేశం పార్టీ వ్యవస్థాపకుడు నందమూరి తారక రామారావుకు భారీ విగ్రహాన్ని నిర్మించేందుకు రాష్ట్ర ప్రభుత్వం సిద్ధమైంది.
అసలు ఈ ఆలోచన చాలా సంవత్సరాల క్రితమే తలెత్తినా, ఆ అమలుకు మాత్రం చాలా కాలం పట్టింది.
ఇప్పుడు అమరావతి కోర్ క్యాపిటల్ పరిధిలో ఈ విగ్రహాన్ని నిర్మించే దిశగా చర్యలు ప్రారంభమయ్యాయి.
అమరావతి డెవలప్‌మెంట్ కార్పొరేషన్ లిమిటెడ్ (ADCL) ఆధ్వర్యంలో అమరావతిలోని నీరుకొండ ప్రాంతంలో ఎన్టీఆర్ విగ్రహం, స్మారక చిహ్నాన్ని నిర్మించేందుకు ప్రాజెక్ట్ రూపకల్పనను ప్రారంభించారు.
ఇందుకోసం ప్రొఫెషనల్ కన్సల్టెంట్‌ను నియమించేందుకు టెండర్లు పిలిచారు. అలాగే విగ్రహం రూపాన్ని సూచించే కొన్ని నమూనా చిత్రాలు కూడా విడుదల చేశారు.
వివరాలు
స్టాట్యూ ఆఫ్ యూనిటీ శైలిలో ఎన్టీఆర్ విగ్రహం
ఈ విగ్రహం రూపకల్పనలో గుజరాత్‌లోని ప్రసిద్ధ "స్టాట్యూ ఆఫ్ యూనిటీ" శైలి ఆధారంగా ప్రణాళికలు రూపొందిస్తున్నారు.
ఇటీవల మంత్రి నారాయణ నేతృత్వంలోని బృందం గుజరాత్‌ను సందర్శించింది.
అక్కడ వారు సర్దార్ వల్లభాయ్ పటేల్ భారీ విగ్రహం - స్టాట్యూ ఆఫ్ యూనిటీని సందర్శించడమే కాకుండా, నరేంద్ర మోదీ స్టేడియాన్ని కూడా పరిశీలించారు.
గుజరాత్‌ను ఆదర్శంగా తీసుకుని ఇప్పుడు అమరావతిలో కూడా ఎన్టీఆర్ విగ్రహాన్ని నిర్మించడం తో పాటు దేశంలోనే అతిపెద్ద క్రికెట్ స్టేడియాన్ని కూడా నిర్మించాలనే ప్రణాళికలు ప్రభుత్వం సిద్ధం చేస్తోంది.
ప్రాధమిక దశలో ఎన్టీఆర్ విగ్రహ నిర్మాణంపై దృష్టి సారిస్తున్నారు.
వివరాలు
కోర్ క్యాపిటల్ రోడ్-మ్యాప్‌లో ఎన్టీఆర్ విగ్రహ స్థానం
అమరావతిలోని కోర్ క్యాపిటల్ ప్రాంతంలో ముఖ్యమంత్రి నివాసం,ఇతర కీలక భవనాలు కలుపుకొని మొత్తం 6 కిలోమీటర్ల పొడవైన రహదారిని నిర్మించనున్నారు.
ఈ రహదారి వెడల్పు సుమారు ఒక కిలోమీటర్ ఉంటుంది. ఈ రహదారి చివరగా ఉండే నీరుకొండపై ఎన్టీఆర్ విగ్రహం ఏర్పాటు చేయనున్నారు.
ముఖ్యమంత్రి ఆకాంక్ష ప్రకారం, ఈ విగ్రహాన్ని అమరావతికి ప్రధాన ఆకర్షణగా తీర్చిదిద్దాలనే లక్ష్యంతో ప్రణాళికలు రూపొందిస్తున్నారు.
ప్రభుత్వ యంత్రాంగం ఇప్పటికే ఇందుకు సంబంధించిన ఏర్పాట్లను వేగవంతం చేసింది.