Vizag Steel:విశాఖ ఉక్కు కర్మాగారంలో ప్రమాదం.. 300 టన్నుల ద్రవ ఉక్కు నేలపాలు
ఈ వార్తాకథనం ఏంటి
విశాఖపట్టణంలోని ఉక్కు కర్మాగారంలో ఆదివారం మధ్యాహ్నం ప్రమాదం చోటుచేసుకుంది. ఈ ఘటనలో బ్లాస్ట్ ఫర్నెస్-2 నుంచి సుమారు 300 టన్నుల ద్రవ ఉక్కు నేలపైకి కారడంతో ఆ ప్రాంతంలో ఉద్రిక్త పరిస్థితి ఏర్పడింది. సాధారణ ప్రక్రియ ప్రకారం, బ్లాస్ట్ ఫర్నెస్ నుంచి ఉత్పత్తి అయ్యే ద్రవ ఉక్కును టర్బో ల్యాడిల్ కార్‌ (TLC) లోకి నింపి, అక్కడి నుంచి స్టీల్ మెల్టింగ్ షాప్‌(SMS)కు తరలించే ఏర్పాట్లు చేశారు. అయితే ఈ ప్రక్రియలో అకస్మాత్తుగా టీఎల్‌సీ కార్‌లో రంధ్రం ఏర్పడింది. దాంతో అందులో ఉన్న ద్రవ ఉక్కు ఒక్కసారిగా కిందకు జారిపడి, నేలపైకి వ్యాపించింది. ఈ ఘటన కారణంగా అక్కడి ట్రాక్ పై ఉన్న కేబుల్స్ పూర్తిగా కాలిపోయాయి. ట్రాక్ కూడా తీవ్రంగా దెబ్బతింది.
వివరాలు
ప్రమాదంలో ఎలాంటి ప్రాణనష్టం సంభవించలేదు
అయితే ఈ ప్రమాదంలో ఎలాంటి ప్రాణనష్టం లేకపోవడంతో అందరూ ఊపిరి పీల్చుకున్నారు. విషయం తెలిసిన వెంటనే అక్కడికి చేరుకున్న అధికారులు, అగ్నిమాపక సిబ్బంది వెంటనే మంటల్ని అదుపు చేశారు. అనంతరం ట్రాక్‌పై కారిన ఉక్కును, టీఎల్‌సీ కార్‌ను తొలగించే పనుల్లో నిమగ్నమయ్యారు. ఇటీవలే టీఎల్‌సీకి రిఫ్రాక్టరీ లైనింగ్ వేయడం జరిగింది. సాధారణంగా ఆ లైనింగ్ సుమారు 1,050 హీట్ల వరకూ సేవలందించగలగాలి.
వివరాలు
500 హీట్లు పూర్తవకముందే రంధ్రం
కానీ ఈ ఘటనలో అది కేవలం 500 హీట్లు పూర్తవకముందే రంధ్రం పడిపోవడం ద్వారా,లైనింగ్ పనుల్లో నాణ్యతా లోపం ఉన్నట్లు భావిస్తున్నారు. దీనిపై ఉద్యోగులు అసంతృప్తి వ్యక్తం చేస్తూ ఆరోపణలు చేస్తున్నారు. ఈ నేపథ్యంలో ఇలాంటి ఘటనలు మరల జరగకుండా చూసేందుకు తగిన జాగ్రత్తలు తీసుకోవాలని, అనుభవం కలిగిన నిపుణులతోనే ఇటువంటి బాధ్యతలు అప్పగించాల్సిన అవసరం ఉందని స్టీల్ ఇంటక్ అధ్యక్షుడు పి.వి. రమణమూర్తి, సీటూ ప్రధాన కార్యదర్శి యు. రామస్వామి డిమాండ్ చేశారు.