Andhrapradesh: రీస్టార్ట్‌ ఏపీలో భారీ పెట్టుబడులు.. 10 భారీ పరిశ్రమల ఏర్పాటు.. 33,966 మందికి ఉపాధి
ఆంధ్రప్రదేశ్ కూటమి ప్రభుత్వం పరిశ్రమల అభివృద్ధిపై తన తొలి ముద్రను వేసింది. "రిస్టార్ట్ ఏపీ" పథకం ద్వారా రాష్ట్రంలో భారీ పెట్టుబడుల రాబడి ప్రారంభమైంది. కూటమి అధికారం చేపట్టిన ఐదు నెలల వ్యవధిలోనే, పరిశ్రమలు, ఇంధన రంగాలకు సంబంధించిన 10 కీలక పరిశ్రమల ఏర్పాటుకు ప్రభుత్వం ఆమోదం తెలిపింది. ముఖ్యమంత్రి చంద్రబాబు నాయుడు నేతృత్వంలో మంగళవారం సచివాలయంలో జరిగిన రాష్ట్ర పెట్టుబడుల ప్రోత్సాహక మండలి (ఎస్‌ఐపీబీ) తొలి సమావేశంలో ఈ నిర్ణయాలు తీసుకున్నారు.
స్టీల్ ప్లాంట్‌ల ద్వారా భారీ ఉపాధి
ఈ పరిశ్రమల ద్వారా రాష్ట్రానికి రూ. 85,083 కోట్ల పెట్టుబడులు లభించనున్నట్లు, సుమారు 33,966 మందికి ఉపాధి అవకాశాలు కల్పించనున్నట్లు ప్రభుత్వం పేర్కొంది. పారిశ్రామిక విధానాలకు అనుగుణంగా ఉద్యోగాల రీతిని ఆధారంగా తీసుకుని ప్రోత్సాహకాలను ఇవ్వాలని ఈ సమావేశం నిర్ణయించింది. ఆర్సెలార్ మిత్తల్ సంస్థ జపాన్‌కు చెందిన నిప్పన్ స్టీల్స్‌తో కలిసి విశాఖపట్నం జిల్లాలో ఇంటిగ్రేటెడ్ స్టీల్ ప్లాంట్ ఏర్పాటుకు ప్రతిపాదనలు సమర్పించగా, రూ. 61,780 కోట్ల పెట్టుబడులకు ప్రభుత్వం ఆమోదం తెలిపింది. ఈ ప్రాజెక్టు ద్వారా 21,000 మందికి ఉపాధి లభించనుంది.
రక్షణ, ఎలక్ట్రానిక్స్ రంగాల్లో పెట్టుబడులు
భారత్ ఫోర్జ్ అనుబంధ సంస్థ కళ్యాణి స్ట్రాటజిక్ సిస్టమ్స్ రక్షణ రంగానికి అవసరమైన ఉత్పత్తులు తయారుచేసేందుకు రూ. 1,430 కోట్ల పెట్టుబడితో పరిశ్రమ ఏర్పాటు చేయనుంది. అలాగే, ఎల్జీ ఎలక్ట్రానిక్స్ రూ. 5,001 కోట్ల పెట్టుబడులతో వినియోగ వస్తువుల తయారీ పరిశ్రమను స్థాపించేందుకు ముందుకు వచ్చింది. ఇంధన రంగంలో భారీ ప్రాజెక్టులు వైఎస్సార్, అన్నమయ్య జిల్లాల్లో ఆస్తా గ్రీన్ ఎనర్జీ సంస్థ 1,800 మెగావాట్ల పంప్డ్ స్టోరేజ్ విద్యుత్ ప్రాజెక్టు కోసం రూ. 8,240 కోట్ల పెట్టుబడులు ప్రకటించింది. అదనంగా, కర్నూలు, నంద్యాల జిల్లాల్లో సౌర మరియు పవన విద్యుత్ ప్రాజెక్టులు ప్రతిపాదించబడ్డాయి.
పెట్టుబడిదారులకు గౌరవం కీలకం: సీఎం
ప్రత్యేకించి పెద్ద పరిశ్రమలు రాబట్టడానికి ప్రభుత్వ యంత్రాంగం కృషి చేయాలని సీఎం చంద్రబాబు అన్నారు. భూసేకరణలో ప్రజల ప్రయోజనాలను దృష్టిలో ఉంచుతూ, న్యాయమైన పద్ధతులను అవలంబించాలని సూచించారు. ఈ సమావేశంలో పలువురు మంత్రులు, ప్రభుత్వ ప్రధాన కార్యదర్శి, ఇతర అధికారులు పాల్గొన్నారు. ఈ నిర్ణయాలు ఆంధ్రప్రదేశ్ అభివృద్ధికి దోహదపడతాయని ఆశిస్తున్నారు.
