Kulgam: జమ్ముకశ్మీర్ లో ఆర్మీ వాహనం బోల్తా.. ఒక సైనికుడు మృతి.. తొమ్మది మందికి గాయాలు
జమ్ముకశ్మీర్‌లోని కుల్గాంలో దురదృష్టకర ఘటన చోటుచేసుకుంది. సైనికులు ప్రయాణిస్తున్న ఆర్మీ వాహనం బోల్తా పడింది. ఈ ప్రమాదంలో ఒక సైనికుడు ప్రాణాలు కోల్పోయాడు. మరో తొమ్మిది మంది గాయపడ్డారు. గాయపడిన వారిని సమీపంలోని ఆసుపత్రికి తరలించి చికిత్స అందిస్తున్నారు. బాధితుల పరిస్థితి ప్రస్తుతం నిలకడగా ఉందని అధికారులు తెలిపారు. చినార్ కార్ప్స్‌ అధికారుల ప్రకారం, శుక్రవారం రాత్రి ఉగ్రవాదులపై కొనసాగుతున్న ఆపరేషన్‌లో పాల్గొనేందుకు బయలుదేరిన ఆర్మీ వాహనం డీహెచ్ పోర ప్రాంతంలో ప్రమాదానికి గురైంది. వేగంగా సైనికులకు తగిన వైద్యం అందించినందున, గాయపడిన వారిలోని ఆరోగ్యం నిలకడగా ఉందని అధికారులు వెల్లడించారు. .
చికిత్స పొందుతూ సైనికుడు మృతి
అక్టోబర్ 24న బారాముల్లా జిల్లా గుల్మార్గ్ ప్రాంతంలో ఉగ్రవాదులు, భద్రతా బలగాల మధ్య కాల్పులు జరిగాయి. ఈ ఘటనలో ఇద్దరు సైనికులు, ఇద్దరు పౌరులు గాయపడ్డారు. వారిని హుటాహుటిన ఆసుపత్రికి తరలించినప్పటికీ, శనివారం చికిత్స పొందుతూ ఒక సైనికుడు మరణించినట్లు అధికార వర్గాలు తెలిపాయి
