Atishi Marlena: ఏపీలో టీచర్‌ గా పని చేసిన ఢిల్లీ సీఎం అతిషి.. ఆ స్కూల్ ఎక్కడుందంటే!
ఈ వార్తాకథనం ఏంటి
అతిషి మార్లెనా ఇటీవల ఢిల్లీ ముఖ్యమంత్రిగా ఎన్నికయ్యారు. త్వరలోనే ఆమె అధికారికంగా బాధ్యతలు స్వీకరించనున్నారు.
ఆమ్ ఆద్మీ పార్టీ (ఆప్) శాసనసభ పక్ష సమావేశంలో ఎమ్మెల్యేలు ఏకగ్రీవంగా ఆమెను ముఖ్యమంత్రిగా ఎన్నుకున్నారు.
అరవింద్ కేజ్రీవాల్ ఇటీవల ఢిల్లీ మద్యం కుంభకోణం కేసులో జైలుకు వెళ్లిన తరువాత సీఎం పదవికి రాజీనామా చేసిన సంగతి తెలిసిందే.
అతిషి గురించి ఆసక్తికరమైన విషయాలు వెల్లడయ్యాయి. ఆమె ఆంధ్రప్రదేశ్‌లో ఉపాధ్యాయురాలిగా పనిచేసిన అనుభవం ఉంది.
అన్నమయ్య జిల్లా, కురబలకోట మండలంలోని రిషివ్యాలీ స్కూల్‌లో 2003 జులై నుంచి 2004 మార్చి వరకు హిస్టరీ టీచర్‌గా పని చేశారు.
అలాగే, 6,7 తరగతులకు ఇంగ్లీష్ పాఠాలు బోధించారు.
వివరాలు
రిషివ్యాలీ స్కూల్‌ను స్థాపించిన జిడ్డు కృష్ణమూర్తి
ఆమె ఢిల్లీకి ముఖ్యమంత్రిగా మారబోతున్నారని తెలిసి,ఆమె పూర్వ విద్యార్థులు, స్కూల్ స్టాఫ్ సంతోషం వ్యక్తం చేశారు.
ఈ రిషివ్యాలీ స్కూల్‌ను ప్రముఖ తత్వవేత్త జిడ్డు కృష్ణమూర్తి స్థాపించారు. అతిషి 2013లో ఆప్ పార్టీలో చేరారు.
పార్టీ ఎన్నికల మేనిఫెస్టో రూపకల్పనలో కీలక పాత్ర పోషించారు. ఆమె మూడేళ్లపాటు మనీష్ సిసోడియాకు ముఖ్య సలహాదారుగా పనిచేశారు.
2019లో ఈస్ట్ ఢిల్లీ లోక్‌సభ స్థానం నుండి పోటీ చేసి, బీజేపీ అభ్యర్థి గౌతమ్ గంభీర్ చేతిలో ఓడిపోయారు.
2020లో ఢిల్లీ అసెంబ్లీ ఎన్నికల్లో కాల్‌కాజీ నియోజకవర్గం నుంచి విజయం సాధించారు.
వివరాలు
హిస్టరీలో డిగ్రీ.. ఆక్స్‌ఫర్డ్ యూనివర్సిటీ నుండి మాస్టర్స్ డిగ్రీ
2023లో మనీశ్ సిసోడియా అరెస్ట్ అయిన తర్వాత,అతిషి విద్య, ప్రజాపనులు,సంస్కృతి, పర్యాటక శాఖల మంత్రిగా బాధ్యతలు చేపట్టారు.
ఢిల్లీ మద్యం కుంభకోణం కేసులో సిసోడియా,సంజయ్ సింగ్ అరెస్ట్ కావడంతో, ఆప్‌లో ఆమె కీలక నాయకురాలిగా ఎదిగారు.
కేజ్రీవాల్ అరెస్ట్ తర్వాత, అతిషి ఆర్థిక శాఖ సహా మరికొన్ని ముఖ్యమైన శాఖలను నిర్వహించారు.
అతిషి ఢిల్లీ యూనివర్సిటీ ప్రొఫెసర్ విజయకుమార్ సింగ్,త్రిప్తా వహి దంపతుల కుమార్తె.
ఆమె విద్యాభ్యాసం ఢిల్లీలోని స్ప్రింగ్‌డేల్ స్కూల్‌లో జరిగింది.సెయింట్ స్టీఫెన్స్ కాలేజీ నుండి హిస్టరీలో డిగ్రీ తీసుకున్న ఆమె ఆక్స్‌ఫర్డ్ యూనివర్సిటీ నుండి మాస్టర్స్ డిగ్రీ పొందారు.
ఆప్ పార్టీలో క్రియాశీలకంగా పనిచేస్తున్నఅతిషి ప్రస్తుతం ఆ పార్టీ రాజకీయ వ్యవహారాల కమిటీ సభ్యురాలిగా ఉన్నారు.మంత్రిగా మంచి పేరు సంపాదించారు.