AP Best Legislator Award: ఏపీలో శాసనసభ సభ్యులకు ఉత్తమ లెజిస్లేటర్ అవార్డులు.. సిద్ధమైన ప్రణాళిక!
ఈ వార్తాకథనం ఏంటి
పార్లమెంట్‌లో ఎంపీలకు ఉత్తమ పార్లమెంటేరియన్‌ అవార్డు అందజేసినట్టుగానే, ఆంధ్రప్రదేశ్‌ ప్రభుత్వం కూడా రాష్ట్ర శాసనసభలో ప్రతేడాది ఉత్తమ లెజిస్లేటర్ అవార్డు ప్రదానం చేయాలని నిర్ణయించింది. 2025-26 ఏపీ అసెంబ్లీ బడ్జెట్‌ సమావేశాల నుండి వచ్చే ఏడాది బడ్జెట్‌ సమావేశాల వరకు సభ్యుల పార్లమెంటరీ పనితీరును పరిగణనలోకి తీసుకుని, ఈ ప్రతిష్ఠాత్మక అవార్డును ఎంపిక చేయనున్నారు. సభలో సభ్యులు అడిగే ప్రశ్నలు, వారి ప్రవర్తన, చర్చల్లో పాల్పడే తీరును ప్రధానంగా పరిశీలించి ఎంపిక ప్రక్రియ జరగనుంది.
Details
ప్రత్యేక కమిటీ ఏర్పాటు చేయాలని నిర్ణయం
ఈ అవార్డు అమలుపై ముఖ్యమంత్రి నారా చంద్రబాబు నాయుడు, అసెంబ్లీ స్పీకర్‌ చింతకలయ్య అయ్యన్నపాత్రుడితో ఇటీవల సమావేశమై చర్చించారు. గతంలో శాసనసభ్యుల ప్రవర్తన, సభా సంప్రదాయాల గురించి మదింపు జరిపి, నేటి తరానికి ఆదర్శంగా నిలిచేలా సభ్యులు మరింత నాణ్యతతో చర్చల్లో పాల్గొనాలని సీఎం అభిప్రాయపడ్డారు. ప్రజాస్వామ్యంలో అసెంబ్లీ విలువ పెంచేందుకు, ప్రజావాణిని సమర్థవంతంగా వినిపించేందుకు ఈ అవార్డు ఉపయుక్తంగా ఉంటుందని భావించారు. ఈ ఉత్తమ లెజిస్లేటర్ అవార్డు ఎంపిక కోసం అసెంబ్లీలో ఒక ప్రత్యేక కమిటీని ఏర్పాటు చేయాలనే నిర్ణయం తీసుకున్నారు. ప్రస్తుతం కమిటీ ఏర్పాటుపై ప్రభుత్వం ముందడుగు వేస్తోంది. ఈ అవార్డు ప్రక్రియ పూర్తి వివరాలను త్వరలో అధికారికంగా ప్రకటించనున్నారు.