Arvind Kejriwal: విభవ్ కుమార్‌తో లక్నోలో అరవింద్ కేజ్రీవాల్..
ఢిల్లీ ముఖ్యమంత్రి అరవింద్ కేజ్రీవాల్ ప్రస్తుతం ఇండియా బ్లాక్ నేతల సంయుక్త విలేకరుల సమావేశం కోసం లక్నోలో ఉన్నారు. కేజ్రీవాల్ గురువారం ఉదయం లక్నో విమానాశ్రయంలో పార్టీ నేతలు సంజయ్ సింగ్, విభవ్ కుమార్‌లతో కలిసి కనిపించారు. లక్నో విమానాశ్రయంలో కేజ్రీవాల్‌తో విభవ్ కుమార్ ఫోటోలు బయటకు వచ్చినప్పటి నుండి చర్చనీయాంశంగా మారాయి. సీఎం హౌస్‌లో స్వాతి మలివాల్‌పై విభవ్ కుమార్ దాడికి పాల్పడ్డారని ఆరోపణలు ఉన్నాయి. కాగా, స్వాతి మలివాల్ కేసుపై జాతీయ మీడియా విలేఖరి అరవింద్ కేజ్రీవాల్‌ను ప్రశ్నించగా, కేజ్రీవాల్ ఎలాంటి సమాధానం ఇవ్వలేదు. ఈ సమయంలో, కేజ్రీవాల్ కూడా విభవ్ కుమార్‌తో కలిసి కారులో కూర్చొని కనిపించారు.
కేజ్రీవాల్‌ను లక్ష్యంగా తజిందర్ బగ్గా
బీజేపీ నాయకుడు తజిందర్ బగ్గా కేజ్రీవాల్‌ను లక్ష్యంగా చేసుకుని, స్వాతి మలివాల్‌పై దాడి చేసినందుకు విభవ్ కుమార్‌ను ఎప్పుడు శిక్షిస్తారని ప్రశ్నించారు. మహిళా ఎంపీపై దాడి చేసిన విభవ్ కుమార్‌కు అరవింద్ కేజ్రీవాల్ చాలా కఠినమైన శిక్ష విధించారని బగ్గా సోషల్ మీడియా పోస్ట్‌లో ఎద్దేవా చేశారు. విభవ్‌పై కఠిన చర్యలు తీసుకుంటామని సంజయ్ సింగ్ జీ చెబుతున్నప్పటికీ మీరు దేశం మొత్తం పర్యటించడం ప్రారంభించారని అన్నారు.
విభవ్ కుమార్ పై వచ్చిన ఆరోపణలేంటి?
సీఎం నివాసంలో తనపై దాడి జరిగిందని ఆమ్ ఆద్మీ పార్టీ రాజ్యసభ ఎంపీ స్వాతి మలివాల్ ఆరోపించారు. సోమవారం సీఎం కేజ్రీవాల్‌ను కలిసేందుకు వచ్చినట్లు స్వాతి మలివాల్ తెలిపారు.ఆమె డ్రాయింగ్ రూంలో వేచి ఉన్న సమయంలో విభవ్ కుమార్ అక్కడికి చేరుకుని ఆమెతో దురుసుగా ప్రవర్తించాడు. సీఎం అరవింద్ కేజ్రీవాల్ హౌస్‌లో తనపై దాడి చేశారని స్వాతి మలివాల్ నుంచి ఢిల్లీ పోలీసులకు పీసీఆర్ కాల్‌ వచ్చిందని పోలీసు వర్గాలు పేర్కొంటున్నాయి. ఢిల్లీ సీఎం నివాసం నుంచి సోమవారం ఉదయం 9గంటలకు ఢిల్లీ పోలీసులకు రెండు పీసీఆర్ కాల్స్ వచ్చినట్లు ఢిల్లీ పోలీసు వర్గాలు చెబుతున్నాయి. అయితే ఈ వ్యవహారంపై స్వాతి మలివాల్ ఇంకా లిఖితపూర్వకంగా ఫిర్యాదు చేయలేదు.
