Karnataka: దేవాలయాలపై పన్ను చెల్లించాల్సిందే.. కాంగ్రెస్ 'హిందూ వ్యతిరేక విధానాలను' తప్పుబట్టిన బీజేపీ
కర్ణాటకలోని కాంగ్రెస్ ప్రభుత్వం బుధవారం రాష్ట్ర అసెంబ్లీలో 'కర్ణాటక హిందూ మత సంస్థలు, ధార్మిక ధర్మాదాయ బిల్లు 2024'ను ఆమోదించింది. బిల్లు ఆమోదం తర్వాత భారతీయ జనతా పార్టీ కర్ణాటక కాంగ్రెస్ ప్రభుత్వాన్ని "హిందూ వ్యతిరేకి" అనిఅభివర్ణించింది. వాస్తవానికి ₹ 1 కోటి కంటే ఎక్కువ ఆదాయం ఉన్న దేవాలయాల నుండి 10 శాతం, ₹ 10 లక్షల నుండి ₹ 1 కోట్ల మధ్య ఆదాయం ఉన్న దేవాలయాల నుండి 5 శాతం పన్ను చెల్లించాల్సి ఉంటుంది అని కర్ణాటక ప్రభుత్వం చెప్పుకొచ్చింది.
ఖాళీ ఖజానాను నింపుకునేందుకే ఈ బిల్లు: విజయేంద్ర యడియూరప్ప
కాంగ్రెస్ ప్రభుత్వం హిందూ వ్యతిరేక విధానాలను అవలంబించడం ద్వారా తన ఖజానాను నింపుకోవాలని చూస్తోందని కర్ణాటక బీజేపీ అధ్యక్షుడు విజయేంద్ర యడియూరప్ప విమర్శలు గుప్పించారు. రాష్ట్రంలో హిందూ వ్యతిరేక విధానాలను అవలంభిస్తున్న కాంగ్రెస్ ప్రభుత్వం ఇప్పుడు హిందూ దేవాలయాల ఆదాయంపై వంకలు పెట్టి, ఖాళీ ఖజానాను నింపుకునేందుకు హిందూ ధార్మిక సంస్థలు, ధర్మాదాయ శాఖ బిల్లును ఆమోదించిందని ఆయన అన్నారు. ఈ వ్యాఖ్యలపై కర్ణాటక మంత్రి రామలింగారెడ్డి స్పందిస్తూ బీజేపీ మతాన్ని రాజకీయాల్లోకి తీసుకువస్తోందని ఆరోపించారు. హిందూ మతానికి నిజమైన ప్రతిపాదకుడు కాంగ్రెస్ అని అన్నారు.
