ADR: దేశంలో ధనిక సీఎంగా చంద్రబాబు.. పేద ముఖ్యమంత్రిగా మమతా బెనర్జీ
ఈ వార్తాకథనం ఏంటి
ఆంధ్రప్రదేశ్‌ ముఖ్యమంత్రి చంద్రబాబు నాయుడు దేశంలోనే సంపన్న ముఖ్యమంత్రిగా గుర్తింపుపొందారు.
ఆయన కుటుంబం కలిపి మొత్తం రూ.931 కోట్ల ఆస్తులున్నాయి. రూ.10 కోట్ల అప్పు కూడా ఉంది.
పశ్చిమ బెంగాల్ ముఖ్యమంత్రి మమతా బెనర్జీ రూ.15 లక్షల ఆస్తితో ఈ జాబితాలో అట్టడుగున నిలిచారు.
అసోసియేషన్ ఫర్ డెమోక్రటిక్ రిఫార్మ్స్ (ఏడీఆర్) సోమవారం విడుదల చేసిన నివేదిక ప్రకారం, గత అసెంబ్లీ ఎన్నికల సమయంలో చంద్రబాబు దాఖలు చేసిన అఫిడవిట్ ప్రకారం ఆయన పేరు మీద రూ.36 కోట్ల ఆస్తులు ఉండగా, ఆయన భార్య భువనేశ్వరి పేరిట రూ.895 కోట్ల ఆస్తులున్నాయి.
ఇందులో హెరిటేజ్ ఫుడ్స్‌లో ఉన్న షేర్లు కూడా చేర్చారు.
వివరాలు
31 మంది ముఖ్యమంత్రుల మొత్తం ఆస్తి రూ.1,630 కోట్లు
ఏడీఆర్ నివేదిక ప్రకారం,రాష్ట్రాలు,కేంద్ర పాలిత ప్రాంతాల ముఖ్యమంత్రుల సగటు ఆస్తి రూ.52.59 కోట్లుగా ఉంది.
ముఖ్యమంత్రుల సగటు వార్షిక ఆదాయం రూ.13,64,310గా ఉంది. 31 మంది ముఖ్యమంత్రుల మొత్తం ఆస్తి రూ.1,630 కోట్లుగా ఉంది.
సంపన్న ముఖ్యమంత్రులలో రెండో స్థానంలో అరుణాచల్ ప్రదేశ్ ముఖ్యమంత్రి పెమా ఖండూ రూ.332 కోట్ల ఆస్తితో ఉన్నారు,అయితే ఆయనకు రూ.180 కోట్ల అప్పు ఉంది.
కర్ణాటక ముఖ్యమంత్రి సిద్ధరామయ్య మూడో స్థానంలో రూ.51 కోట్ల ఆస్తులతో ఉండగా,ఆయనకు రూ.23 కోట్ల అప్పు ఉంది.
జమ్మూకశ్మీర్ ముఖ్యమంత్రి ఒమర్ అబ్దుల్లా రూ.55 లక్షల ఆస్తులతో అట్టడుగు నుంచి రెండో స్థానంలో ఉన్నారు.
కేరళ ముఖ్యమంత్రి పినరయి విజయన్ రూ.1.18 కోట్ల ఆస్తులతో అట్టడుగు నుంచి మూడో స్థానంలో నిలిచారు.