Climate Risk: డేంజర్ జోన్‌లో ముంబయి; దేశంలోని 9రాష్ట్రాల్లో ప్రమాదకరంగా వాతావరణం
ఈ వార్తాకథనం ఏంటి
2050నాటికి ప్రపంచంలోని 50రాష్ట్రాల్లో వాతావరణం ప్రమాదకరంగా మారనుందని ప్రముఖ వాతావరణ పరిశోధన సంస్థ క్రాస్ డిపెండెన్సీ ఇనిషియేటివ్ (ఎక్స్‌డీఐ) పేర్కొంది. 'గ్రాస్ డొమెస్టిక్ క్లైమెట్ రిస్క్' పేరుతో ఈ మేరకు నివేదికను విడుదల చేసింది.
వాతావరణం ప్రమాదకరంగా మారే 50రాష్ట్రాల్లో 80శాతం భారతదేశం, చైనా, అమెరికాలోనే ఉన్నట్లు ఎక్స్‌డీఐ పేర్కొంది.
భారతదేశంలో పంజాబ్, బీహార్, ఉత్తర్‌ప్రదేశ్, మహారాష్ట్ర, రాజస్థాన్, తమిళనాడు, గుజరాత్, కేరళ, అసోం రాష్ట్రాల్లో వాతావరణం రోజురోజుకు క్షిణించిపోతున్నట్లు నివేదిక చెబుతోంది.
ముఖ్యంగా మహారాష్ట్ర, పంజాబ్, కేరళ రాష్ట్రాలు అత్యంత ప్రమాదకర పరిస్థితిలో ఉన్నట్లు వెల్లడించింది.
ఎక్స్‌డీఐ నివేదిక భారత వాణిజ్య రాజధాని ముంబయి గురించి ప్రత్యేకంగా ప్రస్తావించింది. ఈ నగరంపై వాతావరణ మార్పుల ప్రభావం చాలా తీవ్రంగా ఉంటుందని చెప్పింది.
వాతావరణం
ప్రభావిత ప్రాంతాలు చైనాలోనే ఎక్కువ
ప్రపంచవ్యాప్తంగా చూసుకుంటే మొదటి 50రాష్ట్రాల్లో చైనాదే అధిక వాటా. తూర్పు, దక్షిణ ప్రాంతాలలోని యాంగ్జీ, పెర్ల్ నదుల పరీవాహక ప్రాంతాలతో పాటు డెల్టా ప్రాంతాలు ర్యాంకింగ్స్‌లో మొదటి స్థానంలో ఉన్నాయి.
అమెరికాలో కాలిఫోర్నియా, టెక్సాస్, ఫ్లోరిడా రాష్ట్రాలు అత్యంత ప్రభావిత ప్రాంతాలని ఎక్స్‌డీఐ నివేదిక చెబుతోంది.
టాప్-50 ర్యాంకింగ్స్‌లో బ్రెజిల్, పాకిస్థాన్, ఇండోనేషియా దేశాలు కూడా ఉన్నాయి.
వాతావరణ మార్పుల ప్రభావం ఆయా దేశాల ఆర్థిక వ్యవస్థలపై తీవ్ర ప్రభావం చూపే అవకాశం ఉంది.
వాతావరణ మార్పుల వల్ల ఉపరితల వరదలు, తీరప్రాంత వరదలు విపరీతమైన వేడి, అడవులు కాలిపోవడం, భూకంపాలు, మంచుప్రాంతాలు కరిగిపోవడం, తుపాను లాంటివి సంభవిస్తాయి.