రాహుల్ గాంధీ, ఖర్గేకు థ్యాంక్స్ చెప్పిన దిల్లీ సీఎం కేజ్రీవాల్
కాంగ్రెస్ జాతీయ అధ్యక్షుడు మల్లికార్జున ఖర్గే, అగ్రనేత రాహుల్ గాంధీ, మాజీ ప్రధాని మన్మోహన్ సింగ్‌కు దిల్లీ ముఖ్యమంత్రి, ఆప్ జాతీయ కన్వీనర్ అరవింద్ కేజ్రీవాల్ కృతజ్ఞతలు తెలిపారు. ఈ మేరకు వారికి కేజ్రీవాల్ లేఖలు రాశారు. దిల్లీ సర్వీసెస్ బిల్లుకు వ్యతిరేకంగా ఓటు వేసినందుకు, తమకు మద్దతు ఇచ్చినందుకు దేశ రాజధానిలోని 2 కోట్ల మంది ప్రజల తరపున కృతజ్ఞతలు తెలిపారు. రాజ్యాంగ సూత్రాల పట్ల మీకు ఉన్న విధేయత దశాబ్దాలపాటు గుర్తుండిపోతుందని అరవింద్ కేజ్రీవాల్ చెప్పారు. ఈ పరిణామం భవిష్యత్‌లో రెండు పార్టీల మధ్య భాగస్వామ్యానికి సూచికగా నిలుస్తుందని పేర్కొన్నారు. రాజ్యాంగాన్ని బలహీనపరిచే శక్తులపై పోరాటంలో కాంగ్రస్ పార్టీ నిరంతర మద్దతు కోసం ఎదురుచూస్తున్నట్లు కేజ్రీవాల్ వివరించారు.
