'కాంగ్రెస్, చైనా భాయ్ భాయ్'; రాహుల్ గాంధీపై బీజేపీ కౌంటర్ అటాక్
కేంబ్రిడ్జ్ యూనివర్శిటీలో కాంగ్రెస్ అగ్రనేత రాహుల్ గాంధీ చేసిన ఉపన్యాసం దేశం రాజకీయ దుమారాన్ని రేపుతోంది. కేంద్రంలోని ప్రధాని మోదీ నేతృత్వంలోని ప్రభుత్వాన్ని లక్ష్యంగా చేసుకుని రాహుల్ చేసిన వ్యాఖ్యలపై బీజేపీ కౌంటర్ అటాక్‌కు దిగింది. రాహుల్ మంగళవారం సాయంత్రం కేంబ్రిడ్జ్‌లో 'లెర్నింగ్ టు లిసన్ ఇన్ ది 21వ శతాబ్దం' అనే అంశంపై ఉపన్యాసం ఇచ్చారు. ఈ సందర్భంగా చైనాను పొడుగుతూ ఒక వ్యాఖ్య చేశారు. రెండో ప్రపంచ యుద్ధం నుంచి చైనా, అమెరికా విభిన్న కోణాల్లో అభివృద్ధి చెందాయని, సూపర్ పవర్‌గా ఎదిగాయాని రాహుల్ వ్యాఖ్యానించారు. రాహుల్ చైనాను పొగడటంపై బీజేపీ నాయకులు తీవ్ర స్థాయిలో మండిపడ్డారు. కాంగ్రెస్- చైనా భాయ్ భాయ్ అంటూ విమర్శలు గుప్పిస్తున్నారు.
విదేశీ గడ్డపై భారత్‌ను కించపర్చడం దురదృష్టకరం: అసోం సీఎం
రాహుల్ వ్యాఖ్యలపై అసోం సీఎం హిమంత బిస్వా శర్మ ఘాటుగా స్పందించారు. మొదట విదేశీ ఏజెంట్లు మమ్మల్ని లక్ష్యంగా చేసుకున్నారని, ఇప్పుడు సొంత దేశస్థులే పరాయి భూమిపై టార్గెట్ చేస్తున్నారని విమర్శించారు. ప్రధాని మోదీని లక్ష్యంగా చేసుకునే ముసుగులో విదేశీ గడ్డపై భారత్‌ను కించపర్చడం దురదృష్టకరం అన్నారు. గాంధీ కుటుంబం చైనా నుంచి తీసుకున్న విరాళాల అప్పులు తీర్చడానికి ప్రయత్నిస్తోందని దుయ్యబట్టారు. రాహుల్ నర్మగర్భంగా చైనా నిరంకుశత్వాన్ని సమర్థిస్తున్నారని బీజేపీ మరో నాయకుడు అమిత్ మాల్వియా ట్వీట్ చేశారు. చైనాపై రాహుల్ గాంధీ చేసిన చేసిన వ్యాఖ్యలు చిన్న పిల్లాడిలా ఉన్నాయని బీజేపీ సీనియర్ నేత రవిశంకర్ ప్రసాద్ అన్నారు. విదేశాలకు వెళ్లినప్పుడల్లా భారత్‌ను రాహుల్ అవమానిస్తున్నట్లు ఆరోపించారు.
