Congress : 'కేసీఆర్ పాలనపై చిదంబరం కీలక వ్యాఖ్యలు.. అవన్నీ తెలంగాణలోనే ఎక్కువట'
తెలంగాణ రాజకీయాలపై కాంగ్రెస్ జాతీయ నేత, మాజీ కేంద్ర మంత్రి చిదంబరం కీలక వ్యాఖ్యలు చేశారు. కాంగ్రెస్ పార్టీ వల్లే తెలంగాణ వచ్చిందన్నారు. గురువారం నాంపల్లి గాంధీభవన్‌లో మీడియా సమావేశంలో మాట్లాడిన చిదంబరం, దేశవ్యాప్తంగా డొమెస్టిక్ గ్యాస్ సిలిండర్ ధర హైదరాబాద్‌లోనే ఎక్కువగా ఉందని చిదంబరం అన్నారు. తెలంగాణలో అర్బన్ నిరుద్యోగి రేటు దేశ సగటు కంటే ఎక్కువగా ఉందని ఆందోళన వ్యక్తం చేశారు. ఖాళీగా ఉన్న 80 వేల ఉద్యోగాలను బీఆర్ఎస్ ప్రభుత్వం ఎందుకు భర్తీ చేయలేదని నిలదీశారు. ఇదే సమయంలో నిరుద్యోగం, అధిక ధరలను నియంత్రించడంలో కేసీఆర్ నేతృత్వంలోని తెలంగాణ ప్రభుత్వం ఫెయిలైందన్నారు. తెలంగాణ అప్పులు రూ.3.66లక్షల కోట్లకు పెరిగాయని, ఆర్థిక వ్యవస్థను గాడిన పెట్టాలంటే కాంగ్రెస్ రావాలన్నారు.
కేసీఆర్ పాలనలో నిత్యావసర ధరలు కూడా పైపైనే
మరోవైపు నిరుద్యోగ భృతి హామీని అమలు చేయలేదని, నిరుద్యోగ రేటు మహిళల్లో 9.5 శాతం ఉండగా, పురుషుల్లో 7.8 శాతంగా ఉందని లెక్కలతో సహా వివరించారు. కేసీఆర్ హయాంలో తెలంగాణ రాష్ట్రం అప్పుల కుప్పగా మారిందన్నారు. తెలంగాణలోని ప్రతి పౌరుడిపై సగటున రూ. లక్ష మేర అప్పు ఉంచారని ఎద్దేవా చేశారు. విద్యా రంగానికి కేసీఆర్ కేటాయిస్తున్న నిధులు దేశ సగటు కంటే తక్కువగా ఉందన్నారు. రాష్ట్రంలోని ప్రాజెక్టులను కాంగ్రెస్సే కట్టిందన్నారు. హైదరాబాద్ మహానగర అభివృద్ధి కాంగ్రెస్ ఘనతేనన్నారు. రాష్ట్రంలో అన్ని వర్గాల ప్రజలు తీవ్ర అసంతృప్తితో రగిలిపోతున్నారని, ఈ మేరకు నిత్యావసర ధరలు పెరిగాయన్నారు. పెట్రోల్, డీజిల్ గ్యాస్ ధరలు ఇక్కడే ఎక్కువన్నారు. ఇక్కడి ప్రభుత్వం వ్యాట్ అధికరంగా వసూలు చేస్తోందన్నారు.
