Railway: 2027 నాటికి దేశంలో అన్ని రైల్వే గేట్ల స్థానంలో వంతెనల నిర్మాణానికి కేంద్ర ప్రభుత్వం ప్రణాళిక
ఈ వార్తాకథనం ఏంటి
రైల్వే గేట్ల వద్ద ప్రమాదాల నివారణతో పాటు ట్రాఫిక్ సమస్యలు తొలగించబోతున్నాయి.
2027 నాటికి దేశంలోని అన్ని రైల్వే గేట్ల స్థానంలో వంతెనలు నిర్మించేందుకు కేంద్ర ప్రభుత్వం ప్రణాళిక రూపొందించి, అవసరమైన నిధులను కేటాయించింది.
ఈ ప్రాజెక్టుకు సంబంధించి రాష్ట్రంలో ఇటీవల రైల్వే శాఖ అధికారులు గేట్లు ఉన్న ప్రాంతాలను పరిశీలించి, ఆర్‌యూబీ (దిగువ వంతెన) లేదా ఆర్వోబీ (పైవంతెన) నిర్మాణానికి అనుకూలతను విశ్లేషిస్తూ, స్థల సేకరణపై స్థానిక అధికారులతో చర్చలు నిర్వహిస్తున్నారు.
విజయవాడ డివిజన్ పరిధిలో గూడూరు-అనకాపల్లి స్టేషన్ల మధ్య మొత్తం 390 రైల్వే గేట్లు ఉన్నాయి.
వీటికి సంబంధించి అధికారుల బృందం ఇప్పటివరకు సుమారు 100 రైల్వే గేట్లను పరిశీలించడం పూర్తిచేసినట్లు సమాచారం.
వివరాలు
గత బడ్జెట్‌లో ₹2,400 కోట్లు
ప్రాంతీయ పరిస్థితులు, ట్రాఫిక్ రద్దీ, స్థల లభ్యత వంటి అంశాలను పరిగణనలోకి తీసుకుని ఏ రకమైన వంతెన నిర్మించాలి అనేది నిర్ణయిస్తారు.
కనీసం రెండు వరుసల మార్గంతో వంతెన నిర్మాణం జరగాల్సి ఉండడంతో, అవసరమైన స్థలాన్ని సేకరించాల్సి ఉంటుంది.
చెన్నై-గూడూరు-అనకాపల్లి రైల్వే మార్గంలో అన్ని రైల్వే గేట్ల స్థానంలో వంతెనల నిర్మాణానికి గత బడ్జెట్‌లో కేంద్ర ప్రభుత్వం ₹2,400 కోట్లు కేటాయించింది.
ఇక, వచ్చే బడ్జెట్‌లో మరింత అధిక నిధులు విడుదలయ్యే అవకాశం ఉందని అధికారులు అంచనా వేస్తున్నారు.
పశ్చిమ గోదావరి జిల్లాలో ఆకివీడు, ఉండి, భీమవరం, పాలకొల్లు తదితర ప్రాంతాల్లో ఉన్న రైల్వే గేట్లను విజయవాడ నుంచి వచ్చిన రైల్వే ఎస్‌ఎస్‌ఈ ఎస్‌.శ్రీనివాస్ నేతృత్వంలోని అధికారుల బృందం బుధవారం పరిశీలించింది.