Cyclone Dana: ఒడిశా వద్ద తీరం దాటిన దానా తుఫాన్.. తీరప్రాంత జిల్లాలో భారీ వర్షాలు..
దానా తుఫాన్ ఒడిశా తీరాన్ని దాటింది. అర్ధరాత్రి 1:30 నుంచి 3:30 మధ్య సమయానికి తుఫాన్ తీరం తాకినట్లు వాతావరణ శాఖ అధికారులు వెల్లడించారు. భితార్కానికా నేషనల్ పార్క్, ధమ్రా ప్రాంతాల మధ్య తీరాన్ని తుఫాన్ తాకినట్లు అధికారికంగా ప్రకటించారు. తీరం దాటే సమయంలో గాలులు గంటకు 110 నుంచి 120 కిలోమీటర్ల వేగంతో విరుచుకుపడ్డాయి. ఈ ప్రభావంతో ఒడిశా తీరప్రాంతాలు తీవ్రంగా అల్లకల్లోలమయ్యాయి. ఇక, ఉత్తరాంధ్రలోని పోర్టులకు ఐఎండీ అధికారులు మూడో నెంబర్ ప్రమాద హెచ్చరికను జారీ చేశారు. మత్స్యకారులు వేటకు వెళ్లకూడదని అధికారుల సూచనలున్నాయి.
నిలిపేసిన విమాన సేవలు
భద్రక్‌, జగత్సింగ్‌పూర్‌, బాలాసోర్‌ ప్రాంతాల్లో విస్తారంగా వర్షాలు కురుస్తున్నాయి. పలు ప్రాంతాల్లో చెట్లు, విద్యుత్‌ స్తంభాలు కూలిపోయాయి. అధికారులు ఒడిశాలో 7 వేల పునరావాస కేంద్రాలను ఏర్పాటు చేశారు. లోతట్టు ప్రాంతాల్లో నివసించే సుమారు ఆరు లక్షల మందిని సురక్షిత ప్రాంతాలకు తరలించారు. తుఫాన్ ప్రభావంతో పశ్చిమ బెంగాల్-ఒడిశా మధ్య 400కి పైగా రైళ్లు రద్దయ్యాయి. అంతేకాకుండా, కోల్‌కతా, భువనేశ్వర్‌ విమానాశ్రయాల్లో విమాన సేవలు గురువారం సాయంత్రం నుంచి శుక్రవారం ఉదయం 9 గంటల వరకు నిలిపివేశారు.
