కర్ణాటక పోలీస్ స్టేషన్ లో అరుదైన ఘటన.. తండ్రికి బదిలీ కావడంతో కూతురికి ఇంఛార్జ్ బాధ్యతలు
ఈ వార్తాకథనం ఏంటి
బదిలీపై వెళ్తున్న ఓ పోలీస్ అధికారి, సదరు పోలీస్ స్టేషన్ బాధ్యతలను తన కూతురికే అప్పగించిన అరుదైన సంఘటన కర్ణాటక రాష్ట్రంలో చోటు చేసుకుంది.
మండ్య సెంట్రల్ స్టేషన్ లో కూతురు వర్ష సబ్ ఇన్స్పెక్టర్ గా విధులు నిర్వర్తిస్తున్నారు. అదే ఠాణాలో ఆమె తండ్రి వెంకటేశ్ ఇన్స్పెక్టర్ గా వ్యవహరిస్తున్నారు. ఈ నేపథ్యంలో వెంకటేశ్ ను బదిలీ చేస్తూ ఉత్తర్వులు వెలువడ్డాయి.
అయితే తండ్రి బదిలీపై వెళ్తూ వెళ్తూ సదరు ఇంఛార్జ్ బాధ్యతలను కుమార్తెకు అందించడం విశేషం. ప్రభుత్వ ఆదేశాల మేరకు స్టేషన్ హౌజ్ ఆఫీసరైన తండ్రి నుంచి వర్ష ఛార్జ్ తీసుకున్నారు.
DETAILS
కూతురిని చూసి గర్వంగా ఫీలవుతున్నా : తండ్రి వెంకటేశ్
గతంలో 16 ఏళ్ల పాటు ఆర్మీలో వివిధ హోదాల్లో వెంకటేశ్ సేవలు అందించారు. అనంతరం 2010లో కర్ణాటక పోలీస్ పరీక్షలు రాసి ఎస్సైగా స్టేట్ పోలీస్ సర్వీసులకు ఎంపికయ్యారు.
అనంతరం 2010 నుంచి 2023 వరకు సుమారు 13 ఏళ్లు వెంకటేశ్ వివిధ ఠాణాల్లో విశేషంగా సేవలు అందించారు.
తాజాగా గత ఏడాది జరిగిన పోలీస్ నియామకాల్లో సదరు అధికారి కుమార్తె వర్ష ఎస్సైగా ఎంపికయ్యారు. ప్రొబేషనరీ శిక్షణ పూర్తి చేసుకున్న తర్వాత ఆమె మండ్య ఠాణాలో ఎస్సైగా బుధవారమే బాధ్యతలు చేపట్టారు.
ఈ క్రమంలోనే తండ్రి నుంచి కూతురు బాధ్యతలు స్వీకరించారు. కూతురిని చూసి గర్వంగా ఫీలయ్యానని వెంకటేశ్ హర్షం వ్యక్తం చేశారు. మరోవైపు ఇది తన అదృష్టమని వర్ష తెలిపారు.