Telangana: నిరుద్యోగులకు .. సీఎం రేవంత్ రెడ్డి అదిరిపోయే శుభవార్త!!
ఈ వార్తాకథనం ఏంటి
తెలంగాణ రాష్ట్రంలో నిరుద్యోగ సమస్యను పరిష్కరించాలని హామీ ఇచ్చి అధికారంలోకి వచ్చిన కాంగ్రెస్ ప్రభుత్వం, ఇప్పుడు నిరుద్యోగ యువతకు ఉపాధి కల్పించేందుకు ప్రత్యేక ప్రణాళికను సిద్ధం చేసింది.
ఈ క్రమంలో, రాష్ట్ర పరిశ్రమల శాఖ ఆధ్వర్యంలో ఏఐ ఆధారిత డిజిటల్ ఎంప్లాయ్మెంట్ ఎక్స్చేంజ్ ఆఫ్ తెలంగాణను ప్రారంభించింది.
ఈ డిజిటల్ ప్లాట్ఫామ్ నిరుద్యోగులు, కంపెనీల మధ్య వారధిగా పని చేస్తూ, ఉపాధి అవకాశాలను సులభంగా పొందేందుకు సహాయపడుతుంది.
ప్రత్యేకంగా, నిరుద్యోగుల నైపుణ్యాల ఆధారంగా తగిన ఉద్యోగ అవకాశాలను కల్పించేందుకు ఈ ప్లాట్ఫామ్ రూపుదిద్దుకుంది.
ఉద్యోగావకాశాలు, నైపుణ్యాభివృద్ధి కార్యక్రమాలు, అప్రెంటీస్‌షిప్, ఇంటర్న్‌షిప్ వంటి వివరాలను ఈ పోర్టల్ ద్వారా అందుబాటులో ఉంచుతున్నారు.
వివరాలు
పోర్టల్ ద్వారా అభ్యర్థుల ఎంపిక
నిరుద్యోగులు,ఫైనల్ ఇయర్ విద్యార్థులు తమ వివరాలను పోర్టల్‌లో నమోదు చేసుకోవడం ద్వారా తగిన ఉద్యోగాలకు దరఖాస్తు చేసుకోవచ్చు.
కంపెనీలు తమ అవసరాలకు అనుగుణంగా ఈ పోర్టల్ ద్వారా అభ్యర్థులను ఎంపిక చేసుకోవడానికి వీలవుతుంది.
ఉద్యోగాల సమాచారం నిరంతరం అందుబాటులో ఉండడంతో పాటు, అభ్యర్థులకు మెసేజెస్, ఈమెయిల్స్, కాల్స్ ద్వారా ఇంటర్వ్యూలకు ఆహ్వానాలు పంపిస్తారు.
డీట్ యాప్ ప్లే స్టోర్‌లో అందుబాటులో ఉండి, దాన్ని డౌన్లోడ్ చేసుకొని సైన్ ఇన్ చేయడం ద్వారా నిరుద్యోగులు వారి ప్రొఫైల్ వివరాలను సమర్పించవచ్చు.
ఈ యాప్‌లో నైపుణ్యాభివృద్ధి శిక్షణ కార్యక్రమాలు కూడా అందుబాటులో ఉంటాయి, వీటిని ఉపయోగించుకోవచ్చు.
రేవంత్ సర్కార్ తీసుకొచ్చిన ఈ నిర్ణయం నిరుద్యోగుల భవిష్యత్తుకు మార్గదర్శిగా నిలుస్తుందని అభిప్రాయపడుతున్నారు.