Delhi: ఢిల్లీ నీటి సంక్షోభం.. సుప్రీంకి కేజ్రీవాల్ ప్రభుత్వం.. మూడు రాష్ట్రాల నుండి అదనపు నీటిని డిమాండ్
దిల్లీలో వేడిగాలుల మధ్య తలెత్తుతున్న నీటి సంక్షోభంపై అరవింద్ కేజ్రీవాల్ ప్రభుత్వం ఇప్పుడు సుప్రీంకోర్టును ఆశ్రయించింది. నీటి సమస్యకు సంబంధించి ఢిల్లీలోని హర్యానా, యూపీ, హిమాచల్‌ప్రదేశ్‌ల నుంచి ఒక నెల పాటు అదనంగా నీటిని అందించాలని కోరుతూ ఢిల్లీ ప్రభుత్వం సుప్రీంకోర్టులో పిటిషన్‌ దాఖలు చేసింది. పెరుగుతున్న నీటి సంక్షోభం దృష్ట్యా, ఢిల్లీ ప్రభుత్వం కార్ వాష్‌లు, నిర్మాణ స్థలాల వద్ద త్రాగునీటి వాడకంపై నిషేధంతో సహా అనేక అత్యవసర చర్యలను ప్రకటించింది. ఆమ్ ఆద్మీ పార్టీ నేతృత్వంలోని ఢిల్లీ ప్రభుత్వం బుధవారం నీటిని వృధా చేస్తే రూ.2,000 జరిమానా విధించింది. జరిమానాను అమలు చేయడానికి 200 బృందాలను ఏర్పాటు చేసింది.
ట్యాంకర్లు ఎక్కి నీటిని నింపుకునే పరిస్థితి
చాణక్యపురిలోని సంజయ్ క్యాంపు వద్ద ట్యాంకర్ల నుంచి నీటిని నింపుకునేందుకు ప్రజలు ఫుట్‌పాత్‌లపై క్యూలో నిల్చున్నారు. చాణక్యపురిలోని వివేకానంద కాలనీలో ట్యాంకర్లు ఎక్కి నీటిని నింపుకునే పరిస్థితి నెలకొంది. పెరుగుతున్న సంక్షోభం మధ్య, ముఖ్యమంత్రి అరవింద్ కేజ్రీవాల్ బిజెపి నాయకులు తమ రాజకీయ విభేదాలను పక్కనబెట్టి, దేశ రాజధానిలో నీటి సంక్షోభాన్ని ఎదుర్కోవటానికి కలిసి పనిచేయాలని కోరారు. 'మండే వేడిలో, నీటి డిమాండ్ చాలా పెరిగింది. ఇక ఢిల్లీకి పక్క రాష్ట్రాల నుంచి వచ్చే నీరు కూడా తగ్గిపోయింది. అంటే డిమాండ్ బాగా పెరిగి సరఫరా తగ్గింది. మనమందరం కలిసి దీనిని పరిష్కరించుకోవాలి' అని కేజ్రీవాల్ ఎక్స్ వేదికగా పోస్ట్ చేశారు.
అరవింద్ కేజ్రీవాల్ చేసిన పోస్ట్
ఢిల్లీ వాటా నీటిని హర్యానా అందించడం లేదు : అతిషి
అంతకుముందు, మే 1 నుండి ఢిల్లీ వాటా నీటిని హర్యానా అందించడం లేదని జలవనరుల మంత్రి అతిషి ఆరోపించారు. రానున్న రోజుల్లో నగరానికి యమునా నీటి సరఫరా మెరుగుపడకపోతే, ఢిల్లీ ప్రభుత్వం సుప్రీంకోర్టును ఆశ్రయించవచ్చని ఆమె అన్నారు.
