Congress MLA: బిడ్డ కావాలంటూ బలవంతం.. కాంగ్రెస్ ఎమ్మెల్యేపై అత్యాచారం కేసు
ఈ వార్తాకథనం ఏంటి
కేరళ కాంగ్రెస్ ఎమ్మెల్యే రాహుల్ మామ్‌కుటత్తిల్ (Rahul Mamkootathil)పై అత్యాచారం కేసు నమోదైంది. కేరళకు చెందిన ఒక యువతి రాష్ట్ర ముఖ్యమంత్రి పినరయి విజయన్‌కు ఫిర్యాదు చేస్తూ.. రాహుల్ తనపై లైంగిక దాడికి పాల్పడ్డాడని, అనంతరం గర్భం తొలగించుకోవాలని ఒత్తిడి చేసి బెదిరించాడని పేర్కొనడంతో పోలీసులు ఆయనపై కేసు నమోదు చేశారు. ఆ యువతి ఫిర్యాదులో, తామిద్దరం కొంతకాలం సంబంధంలో ఉన్నామని, తనకు బిడ్డ కావాలని రాహుల్ బలవంతం చేశాడని, తర్వాత గర్భం దాల్చిన తర్వాత మాత్రం అబార్షన్ చేయించాలని తనపై ఒత్తిడి తెచ్చాడని వివరించింది. ఈ కేసులో వారిద్దరి మధ్య ఉన్న ఆడియో సంభాషణలు, వాట్సాప్లో మారుకున్న సందేశాలు వంటి డిజిటల్ ఆధారాలను పరిశీలిస్తూ దర్యాప్తు కొనసాగుతున్నట్లు పోలీసులు తెలిపారు.
వివరాలు
కుట్రపూరితంగా తనపై కేసు నమోదు: మామ్‌కుటత్తిల్
ఈ ఆరోపణలపై ఎమ్మెల్యే రాహుల్ మామ్‌కుటత్తిల్ స్పందిస్తూ—తాను ఎలాంటి తప్పూ చేయలేదని స్పష్టం చేశారు. కుట్రపూరితంగా తనపై కేసు నమోదు చేశారని, దీనిని పూర్తిగా చట్టపరంగా ఎదుర్కొంటానని చెప్పారు. ప్రజలు, న్యాయస్థానం ముందు తన నిర్దోషిత్వాన్ని రుజువు చేసుకుంటానని ఆయన పేర్కొన్నారు. ఇటీవ‌ల రాహుల్ మామ్‌కుటత్తిల్‌పై ఒక నటి చేసిన ఆరోపణలు కూడా పెద్ద చర్చకు దారితీశాయి. ప్రముఖ పార్టీకి చెందిన యువ నేత మూడేళ్లుగా తనను వేధిస్తున్నాడని, అనుచిత ప్రవర్తనకు పాల్పడుతున్నాడని నటి రీని జార్జ్ ఒక ఇంటర్వ్యూలో వెల్లడించారు. ఈ విషయాన్ని పలుమార్లు పార్టీ పెద్దల దృష్టికి తీసుకెళ్లినా స్పందన రాలేదని ఆమె ఆరోపించారు.
వివరాలు
మామ్‌కుటత్తిల్ ప్రాథమిక సభ్యత్వాన్ని రద్దు చేసిన కాంగ్రెస్ పార్టీ
ఆమె నేరుగా రాహుల్ పేరును చెప్పకపోయినా.. బీజేపీ, సీపీఎం శ్రేణులు ఆయనే ఆ నేత అని ఆరోపించాయి. దీనిపై రాహుల్ స్పందిస్తూ, రీని జార్జ్ తనకు స్నేహితురాలేనని, కానీ ఆమె ఆరోపణలు చేస్తున్న వ్యక్తి తానే కావేమో అన్న అనుమానం తనకు లేదని అన్నారు. అయితే విమర్శలు, రాజకీయ ఒత్తిడి కొనసాగుతుండడంతో కాంగ్రెస్ పార్టీ ఇప్పటికే రాహుల్ మామ్‌కుటత్తిల్ ప్రాథమిక సభ్యత్వాన్ని రద్దు చేసిన విషయం తెలిసిందే. ప్రస్తుతానికి ఆయన పాలక్కాడ్ నియోజకవర్గానికి ఎమ్మెల్యేగా పని చేస్తున్నారు.