నంద్యాల జిల్లాలో కూలిన మిద్దె.. ఒకే కుటుంబానికి చెందిన నలుగురు మృతి
నంద్యాల జిల్లాలో దారుణ ఘటన చేసుకుంది. ఒకే కుటుంబానికి చెందిన నలుగురు మృతి చెందడంతో ఆ గ్రామంలో విషాద చాయలు అలుముకున్నాయి. వీరిలో భార్య భర్తలతో సహా ఇద్దరు చిన్న పిల్లలు కూడా ఉన్నారు. చాలగమర్రి మండలం చిన్న వంగలి గ్రామంలో ఈ ప్రమాదం జరిగింది. మట్టి మిద్దె కూలిన ఘటనలో వీరందరూ మృత్యువాత చెందారు. శిథిలాల కింద చిక్కుకున్న వారి మృతదేహాలను గ్రామస్తులు వెలికి తీశారు.
ప్రభుత్వాస్పత్రికి మృతదేహాల తరలింపు
మృతుల్లో దంపతులు గురు శేఖర్ రెడ్డి(45), దస్తగిరిమ్మ (38), వారి కుమార్తెలు పవిత్ర(16), గురులక్ష్మి (10) గా గుర్తించారు. వీరికి ఇంకొ కుమార్తె కూడా ఉంది. ఆమె కడప జిల్లా ప్రొద్దుటూరు ఉషోదయ పాఠశాలలో చదువుకుంటోంది. ఇంట్లో కుటుంబ సభ్యులు నిద్రిస్తుండగా అర్ధరాత్రి సమయంలో మట్టి మిద్దె కూలింది. శుక్రవారం ఉదయం స్థానికులు గమనించి శిథిలాల కింద చూడగా అప్పటికే ఆ నలుగురు చనిపోయారు. పోలీసులు ఘటనా స్థలానికి చేరుకొని, మృతదేహాలను పోస్టుమార్టం నిమిత్తం ప్రభుత్వాస్పత్రికి తరలించారు.
