సుప్రీంకోర్టు మెగా బదిలీలు.. రాహుల్ గాంధీకి స్టే నిరాకరించిన ఆ జడ్జి బదిలీ
ఈ వార్తాకథనం ఏంటి
పరువు నష్టం కేసులో రాహుల్ గాంధీకి విధించిన రెండేళ్ల శిక్ష నిలుపుదలకు నిరాకరించిన గుజరాత్ హైకోర్టు న్యాయమూర్తి జస్టిస్ హేమంత్‌ ప్రచక్ బదిలీ అయ్యారు. ఈ మేరకు సుప్రీంకోర్టు కొలీజియం సిఫార్సు చేస్తూ నిర్ణయం తీసుకుంది.
భారత ప్రధాన న్యాయమూర్తి డీవై చంద్రచూడ్ నేతృత్వంలోని కొలీజియం సభ్యులు జస్టిస్ సంజయ్ కిషన్ కౌల్, జస్టిస్ సంజీవ్ ఖన్నా,జస్టిస్ బీఆర్ గవాయ్, జస్టిస్ సూర్యకాంత్‌ ఆగస్టు 3న బదిలీలకు పచ్చజెండా ఊపారు.
జులైలో మోదీ ఇంటి పేరు కేసులో విధించిన రెండేళ్ల శిక్షను నిలుపుదల చేయాలని కోరుతూ కాంగ్రెస్ అగ్రనేత రాహుల్ గాంధీ గుజరాత్ హైకోర్టును ఆశ్రయించారు.
ఈ మేరకు హైకోర్టు న్యాయమూర్తి జస్టిస్ హేమంత్‌ ప్రచక్ స్టేకు నిరాకరిస్తూ సంచలన తీర్పును వెలువరించారు.
DETAILS
2021లో గుజరాత్ హైకోర్టు న్యాయమూర్తిగా ప్రచక్ నియామకం
పరువు నష్టం కేసులో సూరత్ కోర్టు విధించిన శిక్ష న్యాయపరమైందేనని, దీన్ని నిలిపేసేందుకు ఎటువంటి కారణాలు కనిపించట్లేదన్నారు. ఫలితంగా పిటిషనర్‌ అభ్యర్థనను కొట్టివేస్తున్నట్లు జస్టిస్ హేమంత్‌ ప్రచక్ తీర్పు చెప్పారు.
గుజరాత్ హైకోర్టులో న్యాయవాదిగా వృత్తి జీవితాన్ని ప్రారంభించారు. అనంతరం గుజరాత్ ప్రభుత్వంలో అసిస్టెంట్ ప్లీడర్‌గా విధులు నిర్వర్తించారు.
2021లో గుజరాత్ ఉన్నతన్యాయస్థానం న్యాయమూర్తిగా నియామకమయ్యారు. ప్రస్తుతం అక్కడే పని చేస్తున్నారు.
పాలనా సౌలభ్యం కోసమే బదిలీలు చేపట్టామని సుప్రీంకోర్టు పేర్కొంది. బదిలీల వివరాలను వెబ్‌సైట్‌లో అందుబాటులో ఉంచామని వివరించింది.
ఆగస్ట్ 10న జరిగిన భేటీలో 14 మంది పేర్లను బదిలీలకు సిఫార్సు చేశారు. జస్టిస్ సమీర్ దవే, జస్టిస్ గీతా గోపీ పేర్లు జాబితాలో ఉన్నాయి.