హెచ్3ఎన్2 వైరస్: మహారాష్ట్ర, దిల్లీలో హై అలర్ట్; దేశంలో 9కి చేరిన మరణాలు
ఈ వార్తాకథనం ఏంటి
దేశంలో హెచ్3ఎన్2 ఇన్‌ఫ్లూయెంజా రోజురోజుకు భారీగా పెరిగిపోతున్నాయి. అయితే మారుతున్న వాతావరణ పరిస్థితుల దృష్ట్యా హెచ్3ఎన్2 ఇన్‌ఫ్లూయెంజా వ్యాప్తి ఎక్కువగా ఉండే అవకాశం ఉంది. ఇప్పటికే వైరస్ సోకి 9మంది మృతి చెందినట్లు కేంద్రం ఆరోగ్య శాఖ వెల్లడించింది. ఈ నేపథ్యంలో రాష్ట్రాలు అప్రమత్తమవుతున్నాయి.
మహారాష్ట్ర, గుజరాత్, ఒడిశా, కర్నాటక, పుదుచ్చేరి, తమిళనాడు, అస్సాంలో ఇన్‌ఫ్లూయెంజా కేసులు ఎక్కువగా నమోదవుతున్నాయి.
ఇన్‌ఫ్లూయెంజా లాంటి అనారోగ్యం లేదా తీవ్రమైన శ్వాసకోశ ఇన్‌ఫెక్షన్‌ కేసుల విషయాల్లో కరోనా నిబంధలను పాటించాలని రాష్ట్రాలు, కేంద్ర పాలిత ప్రాంతాలకు కేంద్ర ఆరోగ్య మంత్రిత్వ శాఖ లేఖ రాసింది. మందులు, మెడికల్ ఆక్సిజన్ లభ్యత, కోవిడ్ -19, ఇన్‌ఫ్లూయెంజాను కట్టడి చేసే టీకాలను సిద్ధంగా ఉంచుకోవాలని రాష్ట్రాలకు కేంద్రం సూచించింది.
హెచ్3ఎన్2
రద్దీగా ఉండే ప్రదేశాలకు దూరంగా ఉండాలి: మహారాష్ట్ర, దిల్లీ ప్రభుత్వాలు
వైరస్ వ్యాప్తిని అడ్డుకునేందుకు మహారాష్ట్ర, దిల్లీ ప్రభుత్వాలు హై అలర్ట్‌ను ప్రకటించాయి.
దేశంలో కోవిడ్ -19, హెచ్3ఎన్2 కేసులు పెరుగుతున్న నేపథ్యంలో రద్దీగా ఉండే ప్రదేశాలకు దూరంగా ఉండాలని దిల్లీ ఆరోగ్య మంత్రి సౌరభ్ భరద్వాజ్ ప్రజలను కోరారు. పిల్లలు, వృద్ధుల విషయంలో చాలా జాగ్రత్తగా ఉండాలని సూచించింది. శనివారం డీడీఎంఏ సమావేశం జరగనున్న నేపథ్యంలో హెచ్3ఎన్2 వ్యాప్తిపై చర్చించనున్నారు.
మహారాష్ట్రలోని అన్ని ఆసుపత్రులు అప్రమత్తంగా ఉండాలని సీఎం, డిప్యూటీ సీఎంలు ఆరోగ్యమంత్రిని ఆదేశించారు. రాష్ట్రంలో హెచ్3ఎన్2 వైరస్ విస్తరిస్తోందని, అయితే ఆందోళన చెందాల్సిన అవసరం లేదని ప్రభుత్వం పేర్కొంది. మాస్కులు ధరించాలని, సామాజిక దూరం పాటించాలని కోరింది. రాష్ట్రంలో మళ్లీ హెచ్3ఎన్2, కోవిడ్ కేసులు పెరుగుతున్నాయని స్పష్టం చేసింది.