Ap -Telangana Rains : బంగాళాఖాతంలో తీవ్ర అల్పపీడనం.. తెలుగు రాష్ట్రాల్లో భారీ వర్షాలు!
ఈ వార్తాకథనం ఏంటి
పశ్చిమ మధ్య బంగాళాఖాతంలో తీవ్రమైన అల్పపీడనం ఏర్పడింది.శనివారం నాటికి ఇది వాయుగుండంగా మారే అవకాశముందని వాతావరణ శాఖ తెలిపింది.
ఈ పరిణామంతో,దక్షిణ ఒడిశా,తెలుగు రాష్ట్రాల్లో,కొన్ని చోట్ల మోస్తరు నుండి భారీ వర్షాలు,కొన్నిచోట్ల అతి భారీ వర్షాలు కురిసే ఛాన్స్ ఉందని వెల్లడించింది.
దక్షిణ కోస్తా,రాయలసీమ జిల్లాల్లో భారీ వర్షాలు కురిసే అవకాశముంది. సముద్ర తీరంలో బలమైన గాలులు వీస్తుండడంతో, మత్స్యకారులు వేటకు వెళ్లవద్దని అధికారులు హెచ్చరిస్తున్నారు.
శుక్ర,శని,ఆదివారం రోజుల్లో ఉత్తర కోస్తాలోని కొన్ని ప్రాంతాల్లో భారీ నుంచి అతి భారీ వర్షాలు కురుస్తాయని చెప్పారు.
దక్షిణ కోస్తాలో కూడా భారీ వర్షాలు, రాయలసీమలో తేలికపాటి నుంచి మోస్తరు వానలు పడవచ్చని అంచనా.
వివరాలు
తెలంగాణలో రాబోయే 3 రోజులు
ఆదివారం వరకు సముద్రం అలజడిగా ఉండి, గంటకు 55 కిలోమీటర్ల వేగంతో గాలులు వీచే అవకాశం ఉందని అధికారులు వివరించారు.
సెప్టెంబర్ నెలలో ఒకటి లేదా రెండు అల్పపీడనాలు ఏర్పడే అవకాశం ఉన్నందున, వర్షాల సమయంలో పిడుగులు పడే అవకాశం ఉందని, ప్రజలు అప్రమత్తంగా ఉండాలని సూచిస్తున్నారు.
తెలంగాణలో అల్పపీడన ప్రభావంతో రాబోయే 3 రోజుల్లో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం ప్రకటించింది.
సెప్టెంబర్ 3 వరకు రాష్ట్రంలోని పలు ప్రాంతాల్లో భారీ వర్షాలు కురుస్తాయని తెలిపింది. ఆదిలాబాద్, కొమురం భీం ఆసిఫాబాద్,మంచిర్యాల,జగిత్యాల జిల్లాల్లో భారీ నుంచి అతి భారీ వర్షాలు కురిసే అవకాశం ఉందని పేర్కొంది.
వివరాలు
40 - 50 కిలోమీటర్ల వేగంతో ఈదురుగాలులు
అదేవిధంగా, నిర్మల్, నిజామాబాద్, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్, వరంగల్, హన్మకొండ, హైదరాబాద్, మేడ్చల్-మల్కాజిగిరి జిల్లాల్లో భారీ వర్షాలు కురుస్తాయని చెప్పారు.
వర్షాలతో పాటు ఉరుములు, మెరుపులు, గంటకు 40 - 50 కిలోమీటర్ల వేగంతో ఈదురుగాలులు వీచే అవకాశం ఉందని తెలిపారు.