Jubliee hills Case: జూబ్లీహిల్స్ కేసులో షకీల్‌ అహ్మద్‌ కుమారుడికి ఊరట.. అరెస్ట్‌పై హైకోర్టు రెండు వారాల పాటు స్టే
ఈ వార్తాకథనం ఏంటి
హైదరాబాద్ జూబ్లీహిల్స్ ప్రమాదం కేసులో బీఆర్‌ఎస్‌ పార్టీకి చెందిన బోధన్‌ మాజీ ఎమ్మెల్యే షకీల్‌ అహ్మద్‌ కుమారుడు రహీల్ అమీర్‌ అరెస్ట్‌పై తెలంగాణ హైకోర్టు మంగళవారం స్టే విధించింది. రెండు వారాల తర్వాత నిందితులు పోలీసు చర్యను ఎదుర్కోవాల్సి ఉంటుందని జస్టిస్ విజయ్ సేన్ రెడ్డితో కూడిన హైకోర్టు ధర్మాసనం తన మధ్యంతర ఉత్తర్వుల్లో స్పష్టం చేసింది. ఏప్రిల్ 16న జూబ్లీహిల్స్ పోలీసులు రెండేళ్ల క్రితం జరిగిన రోడ్డు ప్రమాదం కేసులో అతని పేరును నిందితుడిగా చేర్చారు. రోడ్డు నంబర్ 45లో బెలూన్లు అమ్ముతూ రోడ్డు దాటుతున్న కాజోల్ చౌహాన్‌ను కారు ఢీకొట్టింది. ఈ ప్రమాదంలో కాజోల్ రెండు నెలల కుమారుడు రణవీర్ మృతి చెందగా, కాజోల్ తీవ్రంగా గాయపడింది.
Details
హైదరాబాద్‌కు తిరిగి వచ్చిన తర్వాత రహీల్ అమీర్‌ అరెస్ట్
ప్రమాదం జరిగిన వెంటనే ముగ్గురు వ్యక్తులు కారులో అక్కడి నుంచి పరారయ్యారు. కారుపై ఉన్న స్టిక్కర్ ఆధారంగా అది ఎమ్మెల్యే షకీల్‌కు చెందినదిగా గుర్తించిన పోలీసులు ఐపీసీ సెక్షన్ 304 కింద కేసు నమోదు చేసి దర్యాప్తు ప్రారంభించారు. ప్రజా భవన్ సమీపంలో రహీల్ కారు ప్రమాదానికి గురైంది. అయితే ప్రమాదం తర్వాత రహీల్ దుబాయ్ పారిపోయాడు. రహీల్‌పై పలు సెక్షన్ల కింద కేసు నమోదు చేసిన పోలీసులు అతడి కోసం లుకౌట్ నోటీసులు జారీ చేశారు. మే 8న దుబాయ్ నుంచి హైదరాబాద్‌కు తిరిగి వచ్చిన తర్వాత పోలీసులు అతడిని అరెస్టు చేశారు.