పార్లమెంట్ ప్రారంభోత్సవానికి గుర్తుగా విడుదల చేసిన రూ.75 నాణెం ప్రత్యేకతలు, ఎలా కొనాలి?
ఈ వార్తాకథనం ఏంటి
దేశం 75వ స్వాతంత్య్ర వేడుకలను జరుపుకుంటున్న వేళ, కొత్త పార్లమెంట్ భవనం ప్రారంభోత్సవం సందర్భంగా ప్రధానమంత్రి నరేంద్ర మోదీ ఆదివారం ప్రత్యేక రూ.75 నాణెం విడుదల చేశారు.
అయితే భారతదేశంలో ఇలాంటి స్మారక నాణేలను విడుదల చేయడం ఇది మొదటిసారేమీ కాదు.
ప్రముఖులకు నివాళులర్పించడం, ప్రభుత్వ పథకాల గురించి అవగాహన కల్పించడం లేదా కీలకమైన చారిత్రాత్మక సంఘటనలను గుర్తుచేసుకోవడం వంటి అనేక కారణాల వల్ల 1964 నుంచి దాదాపు 150 పైగా నాణేలను విడుదల చేశారు.
జవహర్‌లాల్ నెహ్రూ జయంతిని పురస్కరించుకుని తొలి నాణేన్ని విడుదల చేశారు.
భారత్
రూ.75 నాణెం ప్రత్యేకతలు ఇవే
రూ.75నాణెం 44మిమీ వ్యాసంతో వృత్తాకారంగా ఉంటుంది. దాని బరువు 35గ్రాములు. 50శాతం వెండి, 40శాతం రాగి, 5శాతం నికెల్, 5శాతం జింక్‌ మిశ్రమంతో దీన్ని తయారు చేశారు.
నాణేనికి ముఖం మధ్యలో 'అశోక స్థంభం' ఉంటుంది. దాని కింద 'సత్యమేవ జయతే' అని రాసి ఉంటుంది.
అశోక స్తంభానికి ఎడమ అంచున దేవనాగరి లిపిలో 'భారత్' అని, కుడి అంచున 'ఇండియా' అని ఆంగ్లంలో రాసి ఉంటుంది.
రూ.75 నాణెం రెండో వైపు కొత్త పార్లమెంట్ కాంప్లెక్స్ చిత్రం ఉంటుంది.
పార్లమెంట్ కాంప్లెక్స్ చిత్రం క్రింద '2023' అని ఉంటుంది.
నాణేల చట్టం, 2011 ప్రకారం, వివిధ విలువలతో కూడిన నాణేల రూపకల్పన, ముద్రించే అధికారం కేంద్ర ప్రభుత్వానికి ఉంటుంది.
దిల్లీ
రూ.75నాణేన్ని ఆన్‌లైన్‌లో ఇలా కొనుక్కోవాలి
రూ.75 నాణేన్ని కొనుగోలు చేయాలనుకునే వారు ప్రభుత్వ వెబ్‌సైట్: Indiagovmint.inకు వెళ్లాలి. ఈ సైట్ ద్వారా స్మారక నాణేలను విక్రయిస్తారు.
ఈ నాణేలు చెలామణి కోసం ఉద్దేశించినవి కావు. వీటి ద్వారా లావాదేవీల చేయడం కుదరదు.
స్మారక నాణేలు సాధారణంగా గొప్ప విలువను కలిగి ఉండే సేకరణలు.
స్మారక నాణేలకు ప్రభుత్వం ఒక ధరను నిర్ణయిస్తుంది. అయితే రూ.75 నాణెం ధరను ఇప్పటివరకు నిర్ణయించలేదు.
ధరను నిర్ణయించి ఆన్ లైన్‌లో పెట్టిన తర్వాతే దాన్ని కొనుగోలు చేయడానికి వీలుపడుతుంది.