ప్రపంచంలో అత్యధిక జనాభా కలిగిన దేశంగా భారత్; చైనా కంటే 2.9 మిలియన్లు ఎక్కువ
ఈ వార్తాకథనం ఏంటి
భారతదేశం ఇప్పుడు ప్రపంచంలోనే అత్యధిక జనాభా కలిగిన దేశంగా అవతరించింది.
ఐక్యరాజ్య సమితి జనాభా నిధి (యూఎన్ఎఫ్‌పీఏ) తాజా డేటా ప్రకారం చైనాలో కంటే భారత్‌లో 2.9 మిలియన్ల మంది ఎక్కువ జనాభా ఉన్నారు.
'8 బిలియన్ లైవ్స్, ఇన్ఫినిట్ పాసిబిలిటీస్: ది కేస్ ఫర్ రైట్స్ అండ్ ఛాయిసెస్' పేరుతో ప్రపంచ జనాభా రిపోర్టు- 2023ను యూఎన్ఎఫ్‌పీఏ బుధవారం విడుదల చేసింది.
భారతదేశ జనాభా 1,428.6 మిలియన్లు కాగా, చైనా జనాభా 1,425.7 మిలియన్లుగా ఉన్నట్లు యూఎన్ఎఫ్‌పీఏ పేర్కొంది. ఇరు దేశాల మధ్య 2.9 మిలియన్ల తేడాతో ఉన్నట్లు వెల్లడించింది.
1950నుంచి ఐక్యరాజ్య సమితి జనాభా డేటాను సేకరించి విడుదల చేస్తోంది. ఇన్నేళ్లలో జనాభాలో చైనాను భారత్ అధిగమించడం ఇదే మొదటిసారి.
జనాభా
ఆయుర్దాయం విషయంలో భారతదేశం కంటే చైనా భేష్
చైనా జనాభా ఈ ఏడాది నుంచి క్షీణించడం ప్రారంభించిందని యూఎన్ఎఫ్‌పీఏ మీడియా, సంక్షోభ కమ్యూనికేషన్ల సలహాదారు అన్నా జెఫెరీస్ అన్నారు.
భారతదేశ జనాభా పెరుగుతున్నప్పటికీ దాని జనాభా పెరుగుదల రేటు 1980నుంచి తగ్గుముఖం పట్టినట్లు చెప్పారు. యూఎన్ఎఫ్‌పీఏ నివేదిక ప్రకారం భారతదేశ జనాభాలో 25%మంది 0-14ఏళ్ల మధ్య వయస్సు వారు, 18%మంది 10-19మధ్య, 26% మంది 10-24మధ్య, 68%మంది 15-64మధ్య, 7%మంది 65ఏళ్లు పైబడిన వారు ఉన్నారు.
కానీ చైనాలో 65ఏళ్ల కంటే ఎక్కువ వయస్సు ఉన్నవారు దాదాపు 200మిలియన్ల మంది ఉండటం గమనార్హం.
ఆయుర్దాయం విషయంలో భారతదేశం కంటే చైనా మెరుగ్గా ఉంది. ఇది మహిళల విషయంలో పురుషుల కంటే 82:76గా ఉంది. భారతదేశానికి సంబంధించిన గణాంకాలు 74:71గా ఉన్నాయి.