భారత్‌కు మరిన్ని యుద్ధ విమానాలు.. 97 తేజస్ విమానాల కొనుగోలుకు అనుమతి
భారత వైమానిక దళం (IAF) కోసం 97 తేజస్ లైట్ కంబాట్ ఎయిర్‌క్రాఫ్ట్‌ల కొనుగోలుకు కేంద్ర రక్షణ మంత్రిత్వ శాఖ గురువారం అనుమతి ఇవ్వడంతో భారత్ మరిన్ని యుద్ధ విమానాలను పొందేందుకు సిద్ధంగా ఉంది. అంతేకాకుండా, 156 ప్రచంద్ యుద్ధ హెలికాప్టర్ల కొనుగోలుకు కూడా అనుమతినిచ్చింది. వీటిలో 90 ఆర్మీ హెలికాప్టర్లు కాగా, 66 ఐఏఎఫ్ హెలికాప్టర్లు. తేజస్ విమానం, ప్రచంద్ హెలికాప్టర్లు రెండూ స్వదేశీవి వాటి విలువ రూ.1.1 లక్షల కోట్లు. డిఫెన్స్ అక్విజిషన్ కౌన్సిల్ ఇండియన్ ఎయిర్ ఫోర్స్ Su-30 ఫైటర్ ఎయిర్‌క్రాఫ్ట్ అప్‌గ్రేడ్ ప్రోగ్రామ్‌ను కూడా ఆమోదించింది. తేజస్ మార్క్-1A అనేది 65 శాతానికి పైగా స్వదేశీ భాగాలతో అభివృద్ధి చేసిన యుద్ధ విమానం.
